嚴人寬己

6-10-2019 ❨日❩

中學果時，有老師係咁叫我加入辯論隊， 我推左。 之後辯論隊既同學親自揾我叫我加入， 我都係推左。 除左當年我全力玩運動無時間外， 更重要既係我好唔鍾意同人argue.

可能唔鍾意argue 令我俾人感覺似和平主義者，永遠既中間人。 但我知道我唔係， 包括朋友之間，教會入面， 日常待人處事， 我自己有自己原則， 有企一邊既立場。 只不過我唔鍾意同人argue.  或者我遇得太多長輩經常以高人一級既姿態同你講野，教你做人咩咩之類， 我心里唔認同都hea 左佢， 費事煩。 結果最後我離開果間充滿嚴人寬己既所謂信徒既教會， 自己守唔到教條迫人去守果d,  自己做錯都係岩， 因為我知道argue 贏佢地都係冇用， 佢地既腦根本係按自己益處著想， 其他既都唔係咩。

一d警察朋友經常性同我講暴徒打人傷人破壞公物商店，咁叫所謂公義？！  我同意果d 人要拉， 咁你地做過d 乜野， 普通市民都怒吊， 兩公婆帶小朋友落街玩又吊又話要拉， 制服左示威者仲要打， 7月21 白衫人係mtr 打人完全無視。 所有揾我傾既都係件事企係你果邊既黎傾， 我講下唔同意見又嬲， 咁你揾樹洞傾咪得。

Send 的士佬俾人打爆缸既相俾我問我呢d 就係所謂公義， 打到人成頭血。 點解你唔拎佢開車衝去撞人既片黎講， 兩個少女重傷骨折，分分鐘以後都行唔到，咁就一世， 仲有個南亞人士傷左我都唔講。

我反問返，ok 當我同你係朋友咁傾計， 你有冇尊重過我， 拎部分黎傾， 以偏概全咁講， 除左當我白痴， 仲有就係以為我冇良知。

當然我係度打文就兇狠， 對住佢地笑笑口講左我個point 佢地嬲， 我都冇計， 我唔會好惡咁講， 但連唯一內心既良知都冇得表達， 我會覺得自己冇人性。

唔好同我講咩政治立場， 而家連良知都冇既，唔使argue,  亦冇討論空間。