寬己嚴人

7-5-2019 ❨二❩

(講明先呢篇嘢係講自己返教會， 針對入面見到既人， 唔係講宗教問題， 再講多次係針對入面見到既人)

本人因屋企太窮關係， 父母返工冇時間照顧， 有朋友返教會，就叫佢地帶我返教會， 始終導人向善又有人幫手睇住我。

返去都係想有d bbq 活動， 去下行山， 總之就要有得玩， 唔好講信唔信主先。係教會入面我真係遇到好多真係由心而發既好人， 佢地既善良真係令我感受好深， 亦都係因為佢地我先返左10 幾年教會， 即使離開左咁耐， 我仲有同呢d 對我好到不得之了既教友聯絡， 而家做野揾到錢，亦會請佢地食飯， 因為我真係好感恩細個遇到佢地。

只不過， 入面真心對人好既得少數， 我講緊我返果間。

首先講下入面工作既人， 有牧師， 傳道人， 義工， 實習神學生之類。 我好多謝之前俾我係果度幫手做d 輕鬆既工作，俾我可以賺到d 錢去support 我運動上既gear 同報名費， 習訓費等等。

細個係唔會點發現d 問題， 而當我慢慢懂事， 大過仔又有少少自尊既時候， 就開始多問題。 當時我15 歲左右❨我11 歲返教會❩, 有個新傳道人黎左， 而佢老婆正正係牧師。 佢成日同我地講要全心全意事奉教會， 但我發現佢其實係教會揾著數， 點解， 佢讀書係教會俾， 仲要去外國， 咁你係教會做，有人support 你ok 既， 問題係我睇到佢唔係真心信主， 經常有意無意講屋企點點點， 需要費用， 裝修， 需要買車代步， 由於教會少部分好人都真係好有錢， 幾乎佢講果d 要求都有人幫佢俾。 佢仲要係d感謝主賜俾佢以上種種。 最正係搭小巴， 當年架小巴冇8 達通俾， 我行前同佢俾左10 幾蚊， 條友扮冇野唔俾返一星期得100 蚊零用錢既我， 細小心靈既我唔夠膽問佢拎返。係我離開冇返教會之後， 佢太太即係個牧師resign,  推舉佢做教會最大果個❨我唔知係咪都係牧師， 因我離開左❩, 之後有教友提問佢資格同有咩經驗可以帶領教會， 佢就發脾氣鬧教友， 當然最後條友做唔到最大， 大家不歡而散。

打打下先記得， 前任牧師係因為婚外情離開教會。

再黎講下d 係某半政府機構做中高層， 都幾有貨下， 係d 小朋友班教人要善代人， 捨己為人果d,  總之係好L 偉大果d,  佢都話自己係果d 人。 而事實係， 佢分享過係飛機度想要多杯雪糕， 人地話一人一杯， 跟住佢話自己太鍾意食， 係咁大聲投訴， 呢樣果樣， 最後就有啦， 然後再教大家行李過重都用呢招， 佢話都過到。 教人向善， 但又咁對其他人？？？

仲有好多人真係無論自己做錯咩事， 唔岩唔著都好， 都可以推晒俾主， 係佢既安排， 唔關自己事。 讀書唔好， 做野唔好， 咩都唔好， 肥到嘔有病， 等等， 有人返工計錯數收少左錢， 佢返早， 推左落下更果個人度， 佢可以感謝主推一弓俾果個人， 咁果個人又點？

我身邊一齊大既所謂年青人， 基本上冇咩人留係果度， 佢地都聲稱好信主， 有一對男女結埋婚添， 男既結唔夠半年去叫雞俾人發現。 當年仲鬧d 人做妓女， 呢樣唔得果樣唔得。 我仲好記得自己係分享既團聚問過有單其他教會既男仔強姦教友， 十萬人寫求情信去幫個男既， 開頭仲要叫個受害人唔好公開， 咁即係點。 即場俾個傳道人拉走左去一二角， 插我講埋d 咁既野。 咁即係點？

我唔係想講自己道德好高， 起碼我自己光明磊落， 對我好既人我對佢好， 對我唔好既敬而遠之， 同埋唔好有害人既心， at least 我唔會寬己嚴人。 無奈工作上都遇到好多信教但成日亂X 人既人。