2019 半年結

30-6-2019 ❨日❩

不經不覺2019 年已經過左一半，中期睇睇自己做過d 咩， 紀錄下。

新工岩岩做滿左一年， 冇以前咁受氣， 人工同以前差唔多， 但總算係自己設既限期完成一個course  同申請緊一個行業資格， 雖然自己完全唔想係呢行發展， 不過當係自己對自己一個交待。

運動就真係灰到爆機， 4月整親隻腳， 而家先好返少少， 上星期先開始慢慢做返運動。 由於工時真係太長， 又想多少少時間陪屋企人， 所以減少左好多運動既時間。

財務方面， 貸款仲有岩岩一年就還晒， 5月，6月已經收左部分股票利息， 之後7月，8月仲有少少息收下， 包括大陸債券既息。 呢d 錢雖然唔多， 但我唔會睇少呢d 萬幾千， 因為佢地係錢揾錢， 唔使受氣， 總之都係繼續行最老土既方法， 好慢咁儲錢，買股債，收息加儲既錢再買， 我諗唔會賺好多， 起碼唔會冇增長。
年尾仲可以收返10 萬基金， 5年先賺得7千幾， 到時都係拎返黎買d 股債好過。

仲有就係本身係上份工同而家份工中間有搞過d 服裝野既生意， 由於份工太困身，胎死腹中， 但我好多謝有欣賞我既客人， 去到中途我就送左大部分產品俾客人同朋友， 不過都係蝕左幾千蚊姐， 但個經驗係唔錯， 一路上d 人唔識你既， 做少量產品既d 大公司又唔會理你， 但而家有好多細公司都好樂意幫你搞， 又有d 建議俾你， 我冇諗過一路上會有咁多人會幫我， anyway, 而家真係唔敢講d 咩， 但內心仲有個情意結希望再做到呢樣野， 雖然冇一個proposal 俾自己， 但我會keep 住呢個熱誠。

屋企人真係永遠最重要， 以前真係完全冇放時間係屋企， 上年開始同家人最少去一次家庭旅行， 今年都唔例外， 希望屋企人身體健康， 可以一齊去多d 地方。

最最最想係快d 還晒筆貸款><

公司留人

20-6-2019 ❨四❩

話說而家個經理已經辭左職， 佢係一個好好既大佬， 好肯教人又有耐性冇架子， 佢離職我都有d 失落。

早幾日佢同我地講， 公司呢期走好多人， d 高層叫HR d 經理， General Manager 果d 留人。 其中一下就係HR 個manager 打去X 人地， 你咪搞咁多野啦！

大家都係度笑， 呢個世界真係咩人都有， 咁都叫留人， 真心正！

第二個係舊公司d 人同我講， 話有個畢業做野半年既小朋友resign, 交信俾個經理果時， 俾個經理撕爛封信怒X: 你d 後生仔咪咁L 挨得啦！

結果條友最後唔resign 留低做。 江湖經驗唔夠有時真係會俾人食住。

香港有咁多呢d on9佬真係太美好！

爆晒Message

12-6-2019 ❨三❩

唔好講笑， 科技呢家嘢你話拉近全世界人既距離， 無錯， 真係可以同世界各地既親朋戚友隨時隨地聯絡。

奈何， 呢度係香港。

一個24 小時都俾所謂好有經濟效率既城市， 不斷揸乾人既極限， 創造呢個咁奴隸既制度。

阿叔部電話長期處於過千既message,  真係心血少d 都頂唔順， 變態佬太多， 人工太少， 命太長。 我都唔知自己講咩！？

久病未好

11-6-2019 ❨二❩

已經病足兩星期， 睇左兩次醫生， d 藥都食晒， 好似仲係餘波未了。

呢兩個星期， d 朋友不斷都係講到移民離開香港， 對香港失去信心。

有d 就係咁實際，你想做咩都好， 你冇錢就咩都做唔到， 唔好講話移民咁大件事。 太多朋友本身屋企唔係有錢， 而自己又唔係揾得多果d,  唔理你咩原因想做d , 你都係要還原起點， 計埋條數先講自己要做既野係咪可行。

我唔去評論其他野，如果你真係想離開， 咁你就要儲多d 錢。否則都係永遠離開唔到。

我自己既心態係， 無論係邊到都好， 同屋企人一齊就得。