Travel to Venus

28-7-2019 ❨日❩

我地居住既地方， 繁華度生產力競爭力都係全球首屈幾指， 而自由度更係曾經話係最proud of 既一樣。 奈何生活壓力，長工時， 細小住屋環境等等都令人嘆一口氣。

好多人都係想簡簡單單，打份工揾錢養家， 揾個伴建立家庭，開開心心過生活。 問題係呢個諗法要做出黎已經唔簡單， 好多人都話做幾耐野都揾唔夠錢買樓。 大學畢業唔係神科既，出黎做野萬零蚊個月， 真係唔知點追上生活指數，更何況係建立家庭。

我外甥睇緊圖書， 佢話火星好靚， 我話會帶佢travel to venus,  佢開心到跳起。 仿佛做野既壓力都唔算係d 咩。 有時想如果大家都去美國同堂大佬佢地係果邊生活又會係點， 一定悶到抽筋。

無論怨氣幾重都好， 今日付出既都係為左將來唔使停留係苦況， 我仍然相信我既香港係有希望。

香港好亂

22-7-2019 ❨一❩

好唔想見到咁樣既香港， 香港冇天災， 呢度係一個福地。 無奈太多人為傷害， 大家唔同政見卻換來浴血收場？！

有一種沉重既失落=="

舊同事揾我介紹工作❨二❩

18-7-2019 ❨四❩

而家係晚上11點， 岩岩ot 完返屋企， 我真係冇咩意志， 係呢個時候， 揾我介紹工既舊同事打黎話頂唔順， 聽日返去直接resign,  挨埋一個月通知走人。

其實小弟都係夾硬挨， 幫唔到佢， 亦開解唔到佢， 但我支持佢既選擇， at least 係呢一刻佢既選擇係最忠於而家既自己。

舊同事揾我介紹工作

15-7-2019 ❨一❩

呢排都係繼續天昏地暗做野，ot 到好夜， 攰到冇晒精神。

上星期收到舊同事call,  叫我幫佢， 因為佢話頂唔順， 好大壓力。 事原而家佢條team 4 個人， 一個經理， 對下佢同2 個同level 既同事。 問題就係， 個經理塞左好多野俾佢做， 而果兩個同事又成日夾埋推d 野俾佢做， 搞到好似3 對1 咁， 佢條氣唔順， 推黎推去個經理都人壓返俾佢做，但無奈又冇計， 硬食左好耐， 終於都忍唔住， 想辭工。

係呢個moment,  我公司咁岩請人， 但都同佢分析左唔係佢想像中咁好做， 亦同佢講左有時ot 文化， 佢完全唔理呢d , 一心只想離開而家果間打左足足7 年既公司。

上星期in 完已經好心急咁日日問我有冇消息， 我明白， 我真係明白， 工作量多未必做死人， 但係要人硬食果種委屈真係好激氣， 點解返工要咁受氣， 真係心情唔好， 鄧佢慘， 亦都更加要勉勵自己加多d 力， 盡快離開地獄。

壓力指數上升中

5-7-2019 ❨五❩

係呢兩日，工作壓力重到我有d 呼吸困難， 我feel 到新工作地點真係唔係講笑， 日日差唔多朝8 晚8, 長工時都算， 仲要日日俾人壓， 係咪除左上帝就冇人幫到我？

心情極度沉重中！

OT 工作期再次降臨

4-7-2019 ❨四❩

岩岩先收工， 睇黎呢排都要keep 住至少朝8晚9, 有d 野真係唔到你一個普通既打工仔決定到， 因為呢個係曹仁超博士所講既'勢',  呢個勢係香港人用佢地既血汗建築出黎既， 長年累月， 相比起恆生指數， 香港OT 指數回報每日至少都可以賺10% , 我合約每日返10 個鐘， 今日OT 左4個半鐘， 個回報真係冇無輸， 足足45%,  真係勁過索螺絲同爸飛凸。

呢個OT 既勢相信要第三次世界大戰出現， 耶穌再降世救人， 佛祖大發慈悲關愛世人先可以解救。

賣身既工-外傭

3-7-2019 (三) 豪雨

除左食環外判既清潔工， 我覺得外傭真係香港真慘既工之一， 印尼同菲律賓藉係最多，只講外傭工種， 唔講其他。

打一份工要離鄉別井， 離開自己老公仔女， 去照顧人地既仔女。 就算係放假最多都係約d 同鄉揾d 地方鋪地坐一日， 傾下計，佢地都係幫助香港打工一族，等d 打工仔可以全力貢獻呢個資本社會。

我都試過離開香港打工一年， 其實好多時你去外地玩當然覺得正， 去打工就係另一回事， 根本唔可以咁比。

外傭基本上係用佢地條命賺錢養全家， 老公包2 奶， 仔女疏離， 仲要睇住人地d 仔女， 果種心理矛盾唔係我地可以了解。

其實香港人使自錢請人就當然有返咁上下要求， 我有個師叔話有d 人要請個24小時全天候照顧屋企既傭工， 所有假日既錢佢都照計返。 結果真係有人去做， 佢係全條命賣左俾果家人。 講到尾都係為左屋企人， 佢地願意為左屋企無私付出。

每逢星期日都會見到佢地， 總覺得有一份我見猶憐既感覺。