8月份期指總結

 31-08-2020 ❨一❩

Trade 左11 日左右， 由賺幾千到最後一日輸2千幾。

9 月份會用18 萬買賣大期， 呢11日trade 唔係白過， 之後會點， 一係輸晒保證金13 萬加點數， 即係最後淨返幾萬蚊；又或者日日炒幾轉執幾百幾千。

返工好攰><

唔見左畢業相

 22-8-2020 ❨六❩

今日家姐叫我晒返d 畢業相出黎俾我老豆睇， 等佢仲有記憶時睇返。 但係唔知點解， 當年部相機係借人地既， 我印象中係入左電腦， 一直都冇搞過。 

而家有種莫明既失落， 話說我媽人生最開心就係自己個仔終於大學畢業， 成家人得我一個大學畢業， 佢當初好擔心屋企冇人大學畢業， 家姐升唔到， 細佬讀唔到書， 將所有寄望放晒落我度。

而呢個咁好既回憶， 我竟然咁大意整唔見晒， 真係好唔開心， 亦都唔知點同屋企人講，好失落。

期指第三四日

 20-8-2020 ❨四❩

星期一期指心態唔穩定， 由賺千一蚊最後， 輸返少少， 賺400 平倉

星期二見個市唔對路，冇玩， 同埋做野忙偷唔到時間做trade

星期三 打風冇trade

星期四，即係今日， 忍唔到手要入貨， 一開始買入一張， 慢慢越跌越勁， 但竟然冇即時平倉， 再過多陣先feel到佢今日行trend market,  玩唔到細波覆， 最後平倉輸1200 蚊。

有時間要打篇點解冇咩投資衍生工具既自己會玩起期指， 聽日有機會會再試吓09:30至11:00am再做trade,  慢慢feel下個市。 

期指第二日

 17-8-2020 ❨一❩

今日第二日炒期指， 買賣共15 張

Total win $hkd 2800

太眼瞓， 之後再紀錄

待人以誠

 15-8-2020 ❨六❩

工作上， 基本上我都唔會得罪任何人， 特別人接觸得多既同事， 問題係， 你對人好， d 人就會覺得係好nice❨可以講易話為❩, 就咩都揾你。 當然做左咁多年野， 我梗係識推， 而且都企硬。 係呢d 層面， 我自己係絕對對人唔對事， 因為有d 白痴本身係佢自己做既野， 講幾句就將個波推過黎俾人， 有冇咁pk 啊， 呢d 人損人利己， 所以我係對人。 

另一方面， 我對自己部門同事從來唔慳， 請食飯食tea,  我覺得ok,  又唔係話好多錢， 大家開心就得。 但係你對人好，人地未必對返你好， 呢個我都一早清楚。 有d 人你對佢包容多， 佢當老鳳係要對佢好， 然後就唔太尊重人。 例如有人帶飯食，食完叫同事幫佢洗， 呢d on9 程度有d 得人驚，我聽到都有d 怕怕。

有時對自己下屬好， 佢地唔領情， 而且反應冷淡， 我都會覺得自己好似做多左。 不過我都係以尊重人既態度繼續向前行， 起碼我做左第一步， 如果人地反應唔好， 就唔好理人。 

期指第一日

 14-8-2020 ❨五❩

終於入左錢去試吓買賣期指， 由細期開始熟習下操作先。

今朝百忙抽身用電話一開二， HK50 恒指k 圖同埋證券行app 買賣恒指， on99 一開始本身係要買跌， 但係買左升， 第一次搞錯左， 開頭過左幾分鐘唔到覺， 但係一發現左即刻平倉， 好在賺10 零點， 驚驚青青咁再等佢跌到有signal 再賣出一張買入一張， 貶下眼賺左700 幾蚊， 但係係之後賣出一張， 睇唔到signal 平倉， 個人好亂， 但係竟然有急走止蝕， 差d 輸到喊， 升到上一個山位先平倉。

休息左陣之後再買多一張平倉同賣出一張平倉， 最後賺$843 蚊， 本身朝早仲有好多時間trade,  但係因為中間亂左唔識平倉， 所以就點到即止。

930 am 至1100 am 呢段時間如果有份hea 俾我trade 下期指， 都幾開心wow

期指睇電視電影好多人輸身家， 但係有好多trader 都靠大期揾唔少生活費， 我諗真係要自己學多d 出發， 同埋用模擬倉試玩下先。

不過我咩都冇理， 睇左幾日圖， 內心自己模擬買賣， 覺得ok 直接用真錢買賣， 當然第一次買就買錯撞板， 好在唔使交學費， 不過用真錢， 我今日已經摸熟左個操作。 如果模擬mode,  我可能一d 唔上心， 不過呢d 就睇個人。

期待下次返工日揾個地方偷雞再trade 

失眠

 14-8-2020 ❨四❩

慘啦聽日， 而家已經係凌晨2 點， 仲未瞓得著， 返工一定眼瞓都阿媽都唔認得。

而家起到身返工， 除左係要養屋企呢個原因之外， 就係靠讀書果時做運動員訓練既腹肌， 雖然得四舊， 但唔係佢果幾下有力既收縮， 將肌肉入面既ATP 爆出黎， 我係絕對會輸係張床度。

事到如今， 唯有俾聽日返工好攰既我之後睇返， 成日都問d 人點解lunch 可以唔瞓覺， 俾d 時間我瞓下得唔得。 大家係呢個空間係時間上算係公平， 一日24 個鐘， 問題係你自己點去善用佢， 係善用， 唔係浪費。 

做左咁耐野， 慢慢發覺， 有時真係冇必要追逐得咁緊要， 人係有血有淚有肉有溫度有人情味， 唔使下下都機械人咁， 硬膠膠咁過日子， 如果真係有係呢段時間冇左份工， 起碼我講緊仲有儲蓄用住既先， 雖然要挨一段唔短既時間， 但係我相信苦盡甘來， 就同悠長假期果度木村講就當係上帝賜俾你既一個好長好長既假期。

今晚失眠就當係上帝俾時間我反思， 我好多時都有求於神， 有咩都同佢祈禱， at least 心可以平靜d 面對困難。

係呢三年既還債時期， 係日常使費我真係學識更加謙卑同應使則使， 無特別去慳錢， 但真係減少左好多不必要既使費， 好似買衫買鞋咁。 不過我都相信自己會有奢侈欲望既， 如果真係想買一d 自己鍾意既野， 我都唔會話唔捨得。

仲有就係講堅細個睇完既書真係應該得唐山大地震， 活著， 笑傲江湖等等， 唔過6,7 本書。 但呢3 年我真係去圖書館借左好多書睇， 乜都睇， 音樂，畫畫， 歷史傳記， 投資， 運動等等， 我3,4日至兩星期左右去圖書館一次， 每次借3至5 本書， 計落52 星期除2, 當25x 3, 一年睇75 本書， 而家都借緊圖書館online 書睇， 近排睇好多創業書， 不過冇乜係香港既創業書， 感覺唔貼地。 Anyway,  我睇書唔係話特登迫自己睇， 而係一黎想充實下， 二黎都係隨心睇， 唔會話一定要幾時睇晒。

不過近期最sad 係少左做運動， 肥左唔少， 希望之後可以多d 時間做運動， keep fit d .

今年目標都係儲夠10 萬蚊賺既股票， 而家仲差4 萬， 雖然蟹q 晒， 但我都有信心今年可以做得到， 即管睇吓點。

係時候Zzzzzzzzzzzz

疫情下工作

 11-8-2020 ❨二❩

話說阿叔份工可以話唔太受疫症影響， 人工如常，但工作量就多左， 壓力又大左。 而且呢段時間，走左個大佬，請個同級既同事唔夠2 星期又走左。 一個人挨左2 個月， 今日經理同我講星期一會黎個助理幫我手， 內心憂喜參半， 一黎驚個助理又係好似之前果個變態既， 二黎佢又係岩岩新入行。 不過點都好， 有人幫手點都好過得我一條冷。

至於投資方面， 8 月開始all in 既中國銀行跌到X 街， 1至7 月賺既股票同錢都係帳面上輸返晒有凸， 呢d 情況唯有按兵不動啦。 既然蟹左貨， 而家還晒錢， 咪儲多d 工，夠子彈再出戰。

近期無論點攰都好， 可能因為還晒錢， 個人係現金流方面定左好多， 有時間研究期指，將會用大概5 萬左右買賣細期指， 但係份工太忙， 肯定做唔到day trade.  

十年後既我，希望記得今日既我付出先為你有更好既生活， 用鍾舒漫既給自己的信記下：

很相信能成就大愛 很相信能炫耀自己
很貪心 願天天很多美好的派對
寫封信來留住大志 寫封信來提示自己
寫得低 是心中很多似詩的細碎

懷疑我當天幾多歲
令我寫了一句不怕流淚
懷疑我永遠不會累
就來十行列明十個壯舉

讓我闖出新世界 交出真個性
假使想愛 必會找到親愛伴侶
突然十年便過去 方知歲月冷漠似水
就算筆跡不會變 紙張不會皺
偏偏想笑 竟會得到灰暗情緒
默然從頭讀過去 一句一句太乾脆
一個一個已粉碎

做男人都係大方d 好

 10-8-2020❨一❩

今日返工俾兩個做左幾十年既阿伯高層X 到謝晒皮， 大庭廣眾下插足20 min,  真係咩都飽晒。

而件事好明顯係想插我隔離個經理， 但係佢地d 關係又有d 曖昧， 唔可以單刀直劈， 結果就黎招指桑罵槐， 喪X 俾說話經理聽。 

作為一個頹廢既打工奴隸， 我唯有做好個角色唔出聲， 佢話咩都好，係咁答係係係， sor sor sor...... 一大輪抽插後

經理行埋黎我度：你估我唔知佢地係度俾說話我聽， 星期四開會實借d 投訴我。。。。。❨仲有千零字省略❩

呢件事對我黎講好多時都十常八九， 但係呢種類似係男人既"婆媳糾紛" 真係非言語可以表達， 我唯有一大啖吞左佢。

我都要提多d 自己，男人唔可以窮， 仲要大方d. 

吊！