廣西山區學童

22-5-2020 ❨五❩

蘭金剛， 14 歲， 廣西山區兒童， 母意外身亡，父出外打工， 所有村民都走晒， 得佢一個住係一間危房， 執柴起火摘野菜食， 連母雞生既蛋都話留返等父親返黎俾佢食。 間屋爛到穿晒，瞓既床係空心， 最值錢既係棉被，都俾雨水淋濕。 果度咩都冇， 好難想像一個小朋友獨自係果度生活。

時不時坐係池塘想起阿媽， 因為佢媽媽係果度浸死， 表面好似堅強但始終都係一個細路， 一諗起阿媽就喊左出黎， 佢知道永遠唔會再見到媽媽， 果刻只希望爸爸身體健康。

屋企地板d 爛木都起晒出黎， 最好果d 佢起黎為佢媽做棺木。 訪問期間佢一直都表現好成熟， 記者問佢一個手提袋做書包怕唔怕俾人笑， 把遮爛左點用， 佢都唔介意亦唔怕， 努力返學。

節目最後帶左佢上電視台， 播佢老豆做地盤既情況，做苦力既父親老淚如雨下， 對兒子有份愧疚。

蘭金剛令我流淚， 我尋晚發夢我媽過左身， 我到而家個心仲係好不安， 好後悔成日鬧我媽， 老土d 講，珍惜眼前人。

話返轉頭， 你老味而家係2020 年， 你講文革啊？ 張藝謀套<<一個都不能少>>90 年代初開始有扶貧計畫， 香港人年年捐咁多錢上去， 一個窮到爆既山區家庭一年收入都冇一千蚊， 你同我講仲有蘭金剛呢d 人， 係我角度係要夾個地方官出黎審爆佢， 呢d 節目放出黎又點， 一日唔係根源著手， 一日解決唔到呢d 問題。 我打死唔信d 政府部門冇貪。 2003 年仲讀緊中學既我， 有舊生分享去貴洲起學校， 都係用3 萬蚊， 佢親自上去幫手起。 佢已經講唔知幾多個方案幾多機構捐錢去搞， 到而家都仲可以咁樣。 我唔認係站係道德高地講， 咁到底香港人捐咁多錢返大陸去左邊到？