舊上司上報

13-2-2019❨三❩

一開報紙app 睇到舊上司上報紙， 講佢點樣善待下屬， 有咩事情解決唔到會同d 同事坐低慢慢傾， 話要企係員工果度諗， 人性化d ,最緊要團隊氣氛好。 有d 咩事都唔會第一時間責備下屬。 工餘時間仲做義工貢獻社會等等。

呢d 訪問水份有時真係太高， 不過我講返幾年前跟佢果時既情況。工作上對公司點就無謂多講，話晒人地都上左位。

要講就講下屬睇到既野， 其實都係性格有問題， 條友係唔係都吊左d 細既先， 點解可以講唔係第一時間責備， 仲要有時睇佢插其他同事果時， 唔係因為做錯嘢， 事後佢同我講話總之我唔開心就要揾人吊。 最正係佢1分鐘前怒X 你， 下分鐘問你放左工一唔一齊食飯， 當然係AA 啦。

仲有佢聲稱自己個基督教， 暗底我聽到佢同第2 D 部門同事分享經驗， 話信教小朋友入學有得加分。 係咪真心信？ 我就唔敢講， 不過d 行為就。 成日講咸野都唔係問題， 我都成日講， 問題佢下下對住d 女同事講， 又唔係講笑果隻， 倒如a 同事著裙返工， 佢就話原來你對腳咁靚， 真係想摸下， ><" 呢d 真係over 左。

仲有條友又係典型強迫症， 24hr WhatsApp 你， 就算係你放假， even 係佢自己放假， d 無關痛癢既事都要煩人。

即係話， 你上左位就可以努力造好個對外形像， 當堂唔同晒，自我感覺非常良好。

收爐

4-2-2019 ❨一❩

終於都收爐啦， 尋晚成晚冇咩點瞓， 好在今日返工冇咩野做， 眼瞓到爆炸。

辛苦左一整年， 終於都可以休息下， 重新出發， 呢3 日假要好好好好好瞓下。

初四啟市

失眠

3-2-2019 ❨日❩

星期日又係一星期一次既補眠日， 結果朝早跑完步之後瞓足全日， 由12 點瞓到晚上8 點， 結果係而家凌晨 4 點半都仲係眼光光等天光。

阿叔聽日係要返工架><

年齡不是問題

2-2-2019 ❨六❩

早幾日去家興買d 零食， 排我前面俾錢既伯伯係咁揾散銀埋單， 就咁睇佢買好少野， 但抄散銀抄左好耐， 我八八掛掛望左下佢買咩， 一盒24 裝0.03 既兔強， 仲要係加強持久型。

年齡其實只係一個數字！

走頭有路

<<走頭有路>>
林超賢導演
張家輝 飾 阿旦
黃秋生 飾 雷氣
彭敬慈 飾 阿勁
安　雅 飾 唖女殺手
黃卓玲 飾 阿澄
李耀明 飾 豺狼昆
盧惠光 飾 阿泰

呢套戲係2001年上影既, 第一次睇係係中7 考完A-Level 公開試果時睇,當時只係覺得好好笑, 同埋入面D 笑位完全係現實生活同D同學既日常交談。本身好鍾意睇張家輝D 戲, 而呢一套係開始有別於佢之前既喜劇, 當中同黃秋生, 彭敬慈都有特定既內心戲份, 而呢部份係我第一次睇既時候冇留意到, 而事隔咁多年再睇返個都係覺得好好笑, 但感受係完全唔同。

戲既開頭用貼街招紙介紹演員可以話係心思獨到, 超級Local親民。開頭阿旦就問人跳樓既人背景, 呢樣果樣, 仲以為佢做警察, 原來同班手下搞埸大龍鳳去收數, 呢場戲一開波已經吊晒癮。然後去到酒樓改左對家大佬雷氣張馬飛, 搞到雷氣冇左幾十個, 跟住阿旦拎收數返黎果20萬帶埋手下阿勁一齊著草。

呢幕又係正斗, 加插左個乞衣係度搭嗲, 個艇仔完全係一個導遊黎, 叫佢地帶走佬三寶:回鄉証, 護照, 飛機卡(哈哈)。 之後艇仔推介兩個選擇, 第一係東莞隱形山莊,死唔去仲有得抽獎,  但個乞衣話大陸好悶, 阿旦就問有冇D 好玩D 既。第二個choice 就係去泰國布吉, 有得玩又有女攬, 順理成章梗係去布吉啦。

最記得既一幕就係massage 揀女, 艇仔問阿旦有咩要求, 阿旦話頭髮長長, 嘴唇要厚D 既, 波大就梗架啦, 心情開朗既, 仲要唔好哨牙, 佢驚俾女刨。點知成班豬衝入房, 俾佢地打到豬頭咁。
阿勁就係街邊識左唖女殺手, 仲一見鍾情, 叫大佬阿旦俾D錢佢去幫襯佢既街邊檔。之後做咩都係諗住佢, 希望可以同佢過人世。

雷氣就去泰國搵佢情婦阿澄(阿澄其實係佢老婆搵既人,去套雷氣夾萬密碼), 點知阿旦一早見過阿澄, 仲將佢套密碼單野講左俾雷氣知, 但係雷氣X返阿旦轉頭。佢之後仲直接將密碼交俾阿澄。
 豺狼昆以前打泰拳搵食賺錢俾屋企, 奉命返泰國捉旦同勁返香港。挾持左佢兩個之後就帶埋返去鄉下搵佢阿媽, 當然仲有偷佢大佬D貴價海味送俾親戚。

戲既尾段係槍殺, 雷氣同旦俾殺手追擊, 之後就好渾亂咁又有秩序咁扯晒D人入去, 雷氣中左槍,旦又中左槍, 之後阿澄幫雷氣檔左槍, 啞女要殺阿旦, 阿勁阻止左, 之後啞女都中左槍, 亂到阿媽都唔認得, 成班人哩埋左係個counter 櫃果度。
呢個時候豺狼昆出現救返佢地, 佢同個殺手講數, 俾返錢佢。雷氣話計我兩個, 勁都話計佢兩個, 旦問幾錢, 豺狼昆話兩萬蚊, 雷氣仲問港紙定泰紙, 原來係港紙, 旦話計返成800 蚊港紙一個人。
旦同雷氣講: 我請!
雷氣: 好兄弟!
呢幕真係太爆!!!!!!!!

雖然好多人話佢係爛片, 但事隔咁多年再睇返次, 入面既人物描寫係好細膩,好多位置係花左好多心思入去, 大家角色鮮明。不過實在太多野要交代, 仲有D位對白講的好快, 一時間未必追到。 而做左野咁耐, 睇呢套戲感受深左好多。

豺狼昆留返係泰國做送信, 最緊要可以同返屋企人一齊生活。
勁決定離開阿旦, 同啞女一齊過新生活。
雷氣放棄左做香港黑幫大佬, 同阿澄一齊去左整蛋糕。
至於阿旦好失落之濟係機場見返女朋友, 佢衝埋去攬住女朋友果刻簡直係搵返自己既原點, 自己想要既就係一個伴侶。

套戲既名叫走頭有路, 好多野唔係下下要生要死, 旦有20 萬走佬去泰國, 係果邊都已經可以做皇帝, 日日吃喝玩樂。人生會遇到好多困難, 呢度唔得試下果度, 最緊要清楚自己想要D 咩。雷氣放棄左香港既江山同愛人去整蛋糕, 過D 簡單既生活。自己衡量返邊D先係自己要既野, 邊個唔想樣樣都要齊, 但去到一個位, 你去跳笨豬跳第一下諗到既野就係你最想要既野, 到時你就會識得取捨。