12-5-2019 ❨日❩
由細到大， 完全冇投資同做生意既概念， 就算讀到大學同朋友炒iPhone 都蝕錢。 所以我都覺得自己唔係會揾大錢果d , 係一個好保守既人。
2012 年畢業之後就進入左星期一至六❨長短週❩朝8晚6 加要ot 既工作地獄， 本身唔大使， 俾家用同屋企d 電煤， 儲到幾千一個月咁。 呢個時候， 我俾同事影響，買左架20 年前係新車既civic, 之後再買架電單車。 咁就當然係儲唔到錢啦， 但我都冇計畫過將來， 依然係做野揾錢養屋企養車。
2013 年尾， 升職啦， 加左人工。 開始儲到多少錢。 由於俾人X 得太多同做野時間太長既關係， 就係度諗， 我點先可以擺脫呢個環境， 當然係冇可能一朝一夕可以搞到， 都仲未開始諗投資。
2014年， 俾舊上司亂X , 忍唔住揾第份工， 加左少少人工跳槽， 果時開始諗投資， 因為有個新同事成日講買樓， 但我自己冇咁多錢玩買樓呢個遊戲。 係一個聚會見返中學同學， 佢做金融投資， 就買左10 萬基金， 亦都係因為佢， 我開始自己投資路。 問題係我真係冇自己去了解， 信晒佢， 結果頭一年已經輸差唔多2 萬， 佢hea 9 我， 又叫我買其他， 我覺得好唔好受， 於是就自己亂咁摸。
2015 年， 啟動返一畢業同同學開既股票戶口， 連點買股票都唔識， 搞左好耐都買唔到， 第二日有多d 時間上網慢慢搞， 係當時52 週低既匯豐65 蚊， 我入左一手， 同埋之後抽左兩手ibond, 仲大盈富/工銀/中銀， 個本8 萬左右。 點知匯豐跌到5x , 我有d 緊張， 都唔知點好， 不過都冇理， 擺左係度。
2016 年 開始有利息收， 有千幾蚊， 我好開心， 原來有d 咁既野。 同埋果時又儲到d 錢， 咁岩又有朋友話投資搞生意， 呢度又蝕左人生一大筆。
2017 借左一筆大錢俾屋企人睇醫生， 裝修， 淨返既拎黎炒股。 輸左10 幾萬 加負債。
2018 又信左個小學同學， 夾左6 萬去投資， 又冇埋。 與此同時淨返既錢我唔拎黎每個月還錢， 決定掉10 零萬俾個fd 搞佢鄉下既食店。
2019 得股票，大陸國債， 大陸食店， 等年尾收返同中同買既10 萬基金錢， 就拎黎還錢。
總括計計
2012 冇投資所以冇蝕
2013 都係冇投資
2014 投資左10 萬基金❨到今年好似升返賺幾千❩
2015 開始買股票， 有d 息收5000 蚊左右
2016 中伏， 冇左人生第一筆儲既資金， 應該有50 萬
2017 冇錢， 唯有借錢， 炒賣股票輸約15 萬， 國債收幾千蚊息
2018 俾人呃左6 萬投資， 淨返最後10 萬俾個大陸fd 開食店， 每月有一千左右收
2019 都係得股票， 大陸國債同大陸食店
呢7 年仲有借左錢俾人， 唔會還架啦， 應該5 萬左右。
7 年總計total loss 暫時係80 萬hkd 左右， 希望呢個係我交完既學費， 所以自己都愈來愈保守， 鍾意國債果d 9成9 贏4.27里息， 對我呢d 人黎講已經好足夠。
