5-1-2019 (六)
講講而家既直屬上司K, 佢40頭, 而家係我地前線部門阿頭, 為人熱愛工作, 唔係, 應該係話好L極度熱愛工作先岩。個人老實得黎又會識玩下D古惑野(果d 唔係害人既, 想件事快D解決咁解), 佢同我地都係無所不談, 冇咩駕子, 又會關心D 同事近況, 基本上係90分, 係超級超級市場既超級市場咁長氣, 同埋我個人覺得奴性太過重啦。
K而家睇兩條team, 定期要上寫字樓面對D 高層交代近期或來季將會發生既事, 所以基本上D 高層只會認得佢, 唔會理我地D 低層。有好幾次發生左D 事, 其實就唔關我地部門事, 不過唔知咩野政治原因奶野, K 俾高層插到X到飛起, 而我地班細既安慰佢, 講個高層點點點, K 竟然話佢鬧的好岩, 佢自己成晚冇瞓咁滯反省自己。 OmyGod 啊大佬, 我真係幫唔到佢, 咁亦都冇需要開解佢, 因為K 要為皇上工作, 我點能夠幫到佢。
又例如係工作Whatsapp Group 通知高層(當姓陳先算)到, 叫大家小心:
我: L 樣陳到……
K: 係陳生……
佢細微到呢D 位都要護主, 搞到我都有D 擔心佢會Cap 我圖俾個高層睇。
仲有樣野K對工作上既要求過份地高, 同樣地會要求我地跟佢咁做, 而好多都唔係要求到over 得滯, 好似打份minute 咁, 佢要所有人都要跟足佢format, 仲要畫D圖上去, 畫圖呢下真係其實全team 人都有微言, 因為真係全公司得佢一個人咁做, 要人跟晒佢就真係over 左, 而且佢可以將佢自己既要求唔斷氣咁講足一個鐘, 仲要久唔久就重覆同你再講一次。
至於我之前提過lunch 食飯超級慢動作同埋遲食, 其實lunch 時間1200-1300既, 佢硬係mememoremore 咁12點4,5 咁先出發, 有D 同事都同我反應過叫我同佢講下, 可唔可以準時D 出去食, 早D食完可以返office 瞓一瞓先做野。 基於我覺得K 係無咩唔講得既, 我就好直接同佢反應, 佢都好爽快話好, 但係呢……結果都係冇變過。所以我都係唔出聲做自己野算。 雖然少左休息時間, at least 唔使咁受氣先。
K 每日7點幾已經返到公司附近餐廳食早餐, 再7 點9左右返到去準備工作, 而其他部門係7點55分左右打個卡先出去食早餐。 一個咁傳統愛護公司既人我係真心欣賞佩服, 因為我永遠都唔會做到。
