朋友同朋友買保險

17-2-2019 ❨日❩

尋晚有個好耐冇見既朋友打俾我訴苦， 佢之前係mtr 仆親跌斷腳，呢幾日先返左屋企。 咁佢講咁已經好慘， 但最慘唔係呢樣， 係claim 保險果度， 佢話最後有揾我地共同朋友C 買保險， 而佢打俾我都係因為我地之前傾過呢個問題， 就係我叫佢唔好同佢買。 事發當日揾佢揾唔到， 揾左幾日揾到又呢樣果樣， 完全唔想跟進。

我地呢個共同朋友C 大我地10 幾年， 早係我地大學果時佢突然話轉左工， 我都冇為意係咩工。 記得大學final year,  C 托人約埋我出黎食飯， 果期就係最忙， 論文，功課，練習，返part time,  又冇weekday 得閒。 跟住傾左一輪， 見咁耐冇見就大家firm 星期四， 當年WhatsApp 岩岩興起， 我仲未有， 個朋友星期四lunch 打黎問我地邊， 我話上緊堂， 佢燥燥哋話約左食飯唔出黎， 我自己都無名火起，但都按奈住話一直以為係晚上食。

當然最後我都冇見佢地， 而仆親腳既朋友之後就係俾阿C 佢單獨約左出去sell 保險， 當年佢打黎同我數佢點煩點煩，又sell 一年俾幾萬蚊既plan,  我地當年final year 做野， 冇咁多錢， 但就係咁俾佢sell,  佢仲叫我千奇唔好出去食飯。 之後佢又俾C 打去hard sell,  佢都同我講左好耐， 我就同佢分析， 如果買當然要睇個plan 岩唔岩自己， 個錢自己會唔會俾得太多， 保障足唔足夠等， 仲有當然就係睇個人都底係點， 上唔上心之類， 好似約我食飯都係叫人call 我， 仲要冇咩交帶， 傾都唔會傾得好， 起碼我自己覺得唔順氣先。 咁仲同佢買， 唔好玩啦。

點知， 打俾我數臭C 既朋友最後都同佢買左， 仲要買最貴果個， 當日你唔係唔知呢個人既問題， 買左幾年出事， 揾佢搞， 聲都唔聲。 一早察覺會好有問題， 而家黎後悔？

我以前真係會為朋友好上心， 關心佢地， 有事一定會幫手， 久唔久打電話傾下咁， 講緊讀書果時。 而家忙到X 街，有d 問題真係冇心冇力， 有時覺得做聆聽者都辛苦。

PS 我買保險自己揀過d plan,  d 人sell 一套點點點 千幾蚊， 儲錢咩意外， 揾笨多， 淨買一part 一個月500 內。
重點都係揾識既人買， 而呢個朋友係可靠得黎， 佢有咩問題我係可以X 佢， 而唔係好似上面果位咁。