辭職後獲公司挽留

29-9-2018 (六)

好文分享

你有冇試過辭職後被挽留？結果又有冇留低？

朋友喺雜誌社工作，因為分配工作唔公平嘅問題，一早萌生去意。眼見肯做嘅同事忙到死，卸膊嗰班就繼續呃飯食，內心自然不是味兒。終於佢立定決心遞信，然後──獲公司挽留並答應會處理問題，結果佢開開心心留低並過返正常嘅生活……一個星期咁多。之後歷史不斷重演，公司情況還是老調子。

本身有兩間公司叫佢去Interview，不過因為答應留低所以冇出席，加上已經辭職一次，令佢開口講第二次Resign嘅難度增加，亦唔好意思辭完又辭，最終都係死死地氣繼續忙，而呃飯食嘅同事亦都回復原狀，喺天堂過咗一個星期之後，都係要落返地獄，如夢幻泡影。

一個人會厭倦自己嘅公司，相信都唔係單憑一兩件個別事件造成，而係一直不滿公司嘅架構、制度、環境同埋文化，日積月累，直至心死。上述嘅因素往往係冰封三尺，非一日之寒，你選擇留低，就要有心理準備唔會改變，最終改變嘅只係你心態，即係接受現實。

做咗Recruiter咁耐，好了解公司挽留一個人嘅原因，其實對方想你留低，並唔一定因為你無法取替，只係因為請一個人太煩，教一個人太攰，要一個新人無縫接軌Pick up工作兼且會長做，實在太高難度、太冇保證，牽一髮動全身，搞到主管又搞到其他同事，不如畀少少著數你收返封辭職信。咁到底係為公司好？定係為你好？答案已經好明顯。

我自己曾經有兩次被挽留嘅經驗，留低之後嘅結果都係後悔，其實我一個人留低，點可能令全公司改變？唔理你係Junior定Senior，呢個都係定律，因為一間公司嘅風氣牽涉到太多人，太多傳統，所以我唔會畀呢種事再發生喺自己身上，豁出去係冒險，不過留低係坐以待斃。

公司留人，未必代表你好重要，所以去與留，唔好睇公司，而係要問自己：其實想要啲乜嘢？追求啲乜嘢？公司唔會因為冇咗任何一個人而停止運作，但你嘅人生會因為一個決定而錯失更好機遇。

https://hk.jobsdb.com/en-hk/articles/%E8%81%B6%E7%9E%B3-%E8%BE%AD%E8%81%B7%E5%BE%8C%E7%8D%B2%E5%85%AC%E5%8F%B8%E6%8C%BD%E7%95%99-%E4%B8%8D%E4%BB%A3%E8%A1%A8%E4%BD%A0%E7%84%A1%E6%B3%95%E5%8F%96%E6%9B%BF