2018 年結

31-12-2018❨一❩

不知不覺又過了一年， 今年對自己黎講可謂置之死地而後生， 因為不顧一切裸辭休息， 3個半月之後先返新工， 係呢段期間將自己現金儲備抽乾， 即使預備左夠一年多使費， 點知母親大人牙痛， 整牙都用左差唔多10 雞， 老豆做手術又幾雞， 自己都自high玩高風險投資冇左 6 雞左右。 然後然後稅局仲要計多我d 稅， 就算appeal 都話要我交， 唔係會有罰款， 真係愈窮愈見鬼。但我都請全家去旅行， 最緊要開心。

以上講既錢銀問題我其實不太在乎， 最緊要家人健康， 而今年最重要既係我重生了。

過往5年我係3 間公司做野都泥足深陷， 躺著也中槍， 去到對上果份我真係覺得陷入絕境， 有d 走火入魔， 不能自拔， 基本上就只有工作，OT, 朝8 晚9 既生活， 放假只係做一個鐘慢跑， 跟住全日補眠， 不能自救。 到左一個點就係事無大小自己個心都係無名火起， 表面對住人冇咩野， 實際上自己已經怒火中燒想打人。

係我最最最sad 既時候， 我一個星期日去睇返以前d 小朋友比賽， 如今已經係大學校隊， 當日最渣最唔起眼既運動員， 幾年間成為學校主力， 仲要贏到見報， 我真心俾佢既努力感動到， 睇完比賽當晚我即刻落街跑個10k.

就係咁一步一步慢慢做返運動， 練習，比賽，個人開朗返，積極左， 就算OT 到8,9 點， 我都10 點落街跑步， 第日再爬起身返工。 慢慢開始揾到自己既方向， 工作上既定位。 我唔係要咩位高權重， 更唔係諗住一份牛工揾好多錢， 雖然留係舊公司好似好順利升職加薪， 但係果種壓力同時間根本唔值得， 而且人生真係唔可以得一份工。 裸辭轉工呢個決定的確令我冇左升職加薪既機會， 但係係果段空檔期令我充實內心， 揾到方向。

仲有年半， 收成期會降臨， 那時候我會戰戰兢兢迎接果個無債務既時期， 更踏實去生活。

2018 我以NBA 球星Derrick Rose 既故事作勉勵， 由勇奪MVP 到受重傷低潮， 再到近期入左木狼拎個人職業生涯最高既50 分， 佢既意志真係不可思議。

假期完結

26-12-2018❨三❩

兩日假期話咁快就完左， 好記得上年大概呢個時間計畫緊resign,  放左一星期假， 返到公司就開左呢個blog. 總算有個地方俾我發洩一吓， 如果唔係我應該入左青山。

係做野既WhatsApp 谷已經有人send 病假紙出黎， 夜晚9 點睇醫生拎聽日假紙都好合理既， 搞到我都有d 唔舒服。

聖誕快樂

25-12-2018

聖誕節就諗起阿源， 如果網友無吹水， 佢已經成家立室， 祝佢有份好工，有穩定收入，有朋友，幸福家庭， 阿源聖誕節快樂啊！

窮不過三世

20-12-2018❨四❩

做野做到嘔， 覺得呢個世界冇希望既時候， 我問朋友， 我會唔會呢世人都係咁。 佢話唔會， 窮人起碼三世。

自由空氣

13-12-2018❨四❩

自由空氣

自由， 自己由自己點就點。

空氣， 上帝給予世界禮物。

自由空氣是自己隨時想要上帝給予的禮物。

那麼誰可以得到自由空氣？
什麼方法可以得到自由空氣？
多長時間才可得到自由空氣？

也許你不可能得到；
也許你很快會得到；
更或者你已經得到。

答案或許在你心中。

你永遠那麼吸引， 那麼耀目， 那麼令人渴望。

自由空氣

義務工作受氣

10-12-2018(一)

話說都係自己由細到大既運動組織活躍, 由今年年頭開始做D 義務工作, 自己真係鞠躬盡瘁, 又不至於死而後已果D。 由帶練習, 參加比賽,搞活動, 收錢入數, 開會, 關心下D 青少年, 關心下D長老......我以為唔會好似返工咁, 點Q知俾人係咁入。

由於我之前既工作太困身, 已經冇出席D 活動足足3年有多, 之後返去就俾人投票做幹事, 是但啦, 反正係度咁耐, 始終都有義務幫下手。

因為太多勁人走晒既關係, SPONSOR已經少之有少, 我就問讚助開既商戶既運動員問下, 話可以傾。 咁咪同佢地講, 又話個品牌差, 又話唔show 我地, 對我地之前果幾年點衰點衰, 一早已經想同佢斷絕, 又話果日見我好踴躍費事唔和應我。 大佬啊, 我又冇收錢做野, 又唔係sponsor 我, 個個都圍插我。

再講有個會議想出席下, 同人搞好D關係, 問下有冇人會去, 因為工作關係肯定會遲大到或者去唔到, 點知俾人命令幾遲都要去, 呢下又chok chok 下, 真心燥左。講反轉頭, 好似我一個緊張, 同埋我一個人做咁樣。

唔係係香港挨左咁多年, 我真係頂唔順, 根本而家就俾人夾, 完全冇權力。 之前有好多好友都離開左, 我而家真係覺得好矛盾, 一心想中興返個會, 但泛起左離開既心。         

做野已經人都癲, 而家工餘都咁樣, 我真係灰晒機><"

追夢有價

4-12-2018❨二❩

係香港打工真係世界級辛苦， 工餘時間想休息下都難， 莫論想追求自己既夢想。

由細到大都係運動陪我成長， 籃球同跑步。 身邊既運動朋友好多都係港隊級， 自問水平好低， 唔敢比下去。 而佢地去到一個水平後想突破， 往往要比一般人花費更多時間更多努力， 因為香港呢個社會根本唔支持運動員。

大學有唔同科既運動朋友，本身玩開甲組， 佢係神科專業人士果d,  但卻選擇做一個文員， 放工堅持練習， 目標想去亞運， 但係團體運動少不免都要講際遇， 即使爭取到選拔都未必選中你。 佢一個堅持已經7 年了， 我真係唔知佢而家點。

另一d 會選擇做全職運動員， 其實都唔知叫唔叫全職， 因為佢地練完習唔可以休息， 做教練唯持生計。 佢地目標遠大， 目標係達標去奧運， 呢個目標真係好遠大， 雖然機會微乎其微， 但佢地堅持。 我自問係好欣賞佢地既毅力， 因為佢地每日起身都知道自己為左咩奮鬥， 為左目標努力！

而上屆奧運會馬拉松項目， 香港女子長跑運動員姚潔貞就係達標去到參賽， 香港呢個地方係可以培育出奧運既世界級選手。

不過呢d 例子少之有少， 因為香港呢個社會根本容不下追夢既人。 點解， 真係因為窮， 年青人， 真係因為窮啊！！！！ 同我同屆畢業都不知幾多星級運動員， 22 歲畢業， 運動員生涯仲有好多年可以去突破。 但係， 有幾多個係精英運動員 有糧出，有幾多個係屋企有d 家底去support 你去追夢。 現實就係咁， 你贏左個冠軍返黎， d 人實問你有幾錢。 其實香港好多比賽贏左都係冇錢， 最多有幾千蚊， 而絕大部分只係俾coupon加個杯， 完。

咁大個人， 日日去練習唔揾錢， 真係冇出色， 人地邊個邊個專業人士做左幾年野儲到錢買樓啦。 呢d 就係香港人既核心價值。 而佢地承受緊無比既壓力去爭取自己既夢， 仲要係用盡全力。呢種毅力係一種態度既昇華， 你同一般人講都係俾人笑， 因為社會價值觀根本唔值得一提。

香港既父母大多會俾自己小朋友細個學晒所有琴棋書畫， 到頭來周身刀冇張利。 仲要期望自己個小朋友樣樣天下無敵， 讀書叻，運動叻， 入名校， 入大學神科， 畢業做專業人士揾錢。 其實到頭來都係定位係自己仔女揾到幾多錢， 咁不如你一早將佢去學野d 錢儲起佢， 一路投資，錢滾錢， 等佢畢業俾晒佢， 咁佢咪做到你地想佢揾多d 錢既目標， 搞咁多野做乜。 佢地細個學既興趣都唔係自己鍾意， 又唔係有天份， 點解唔可以俾佢地去揀， 點解一定要迫佢地， 到佢地揾到自己興趣， 仲要係好遠大既目標， 點解唔係果陣全力support 佢。 畢業俾幾年， 5年時間佢去嘗試吓， 爭取下唔得咩， 點解要咁膚淺都係講緊儲錢買樓，香港買樓核心容不下追夢既人。

米高佐敦講過：I can accept failure,  but I cannot accept not trying!

覺得好灰的新聞

3-12-2018 ❨一❩

今日睇新聞，幾乎俾自殺既新聞洗版， 真心覺得呢d 新聞好悲傷， 又為佢地既家人難過。記錄呢d 新聞， 係想提自己， 千奇唔好千奇唔好諗唔開， 因為失去生命既人覺得冇希望或冇辦法面對恐懼， 在世既人更加會責怪自己。

一個16 歲中學生因一個下午逃學， 晚上俾老師打電話去責備， 咁就從高處墮下。

一名婦女在住所頂樓水缸輕生， 一日後先俾人發現。

一名27 步女生華明村高處墮下輕生。

一名男生於豪宅以筆插喉輕生， 送院搶救。

3歲女童猝死， 母親目送最後一程。

今時今日既香港， 我相信都係繼續高壓， 不論小朋友，學生，大人及老人家都面對生活上種重大大小小不同既困難， 但係我覺得呢個世界有好多可以解決方法既問題。 不過我呢d 未到絕處既人又唔知點去講呢d 話題， 引用黃子華對自殺既棟篤笑一段就最適合不過。

想自殺既人就好似食自助餐咁， 佢地食兩啖就唔食， 因為佢地食既自助餐係屎。 如果一日三餐都係食屎，仲要日日食， 真係有邊個唔想死

而有資格死既係佢認為有3種：
第一種係好似希特拉果d,  自己唔想死， 但係有一個民族想你死既。
第二種係屈源果d,  自殺之後可以俾大家有一日假期。
第三種係極度極度不幸既人， 好似美國一對40幾歲既連體嬰， 一個個頭連住另一個既背脊。

世界係好大既， 希望香港呢個高壓城市可以多d 包容少d 投訴， 令世界可以美好一d.

忠心員工

27-11-2018❨二❩


睇到呢幅圖， 我又諗起舊公司做左20 年俾公司炒左既叔叔， 真係灰晒機。
每個人都有佢對公司既情意結， 我就覺得無論如何都唔好太天真咁對一間公司投入感情， 甚至同d 同事， 如果唔係， 最後都係有苦自己知。

4天工作制

14-11-2018(三)

如果真係一星期返4日工就正啦, 咁應該會有返個肝。

【勞工福利】中國建議2030年落實4天工作制，每周工作36小時！

個個都返工，唔通個個都想返工？中國社會科學院表示，有鑑於中國人每日平均休閒時間太少，在《休閒綠皮書：2017~2018年中國休閒發展報告》建議全國推行4天工作制，每日工作9小時，每周合共36小時。

綠皮書建議，分階段實施4天工作制，第一階段從2020至2025年，延長農曆新年假期至8日、增加元宵節假期，加快落實有薪休假，並在東部地區個別行業、國有大中型企業率先試行4天工作。第二階段，是於2020至2029年，在東部及中部地區的部分行業，落實4天工作制。第三階段，由2030年起，全中國實施4天工作制及有薪休假制度，中國上班族工時，會由每周40小時，降至36小時，但同時要延長退休年齡。

其實，外國有不少地方政府或企業，都有推行4天工作制，如美國猶他州政府曾在2008年提出4天工作，大部分州政府僱員周一至周四上班，每日10小時，每周五休息，以提高效率，降低管理成本，並節約能源。惟新制成效不彰，未有如預期般可每年節省300萬美元，居民亦抱怨周五無法使用政府服務，結果實行約2年後宣告結束。

http://businessfocus.presslogic.com/2018/11/12/article/83008/

對人太好辛苦自己

7-12-2018 ❨三❩

人就係不斷重覆犯錯， 本身做好人幫朋友A 裝修， 咁佢自己屋企親自設計， 又落手落腳搞， 搞得唔錯， 佢叫我去佢度幫手， 我都義不容辭。 星期日搞到夜晚11 點幾， 返到屋企都1 點幾先瞓， 最慘第二朝要返工。 呢樣就係我sosad 盡力幫佢既原因。

咁我見佢屋企整到好靚， 我住果度基本上係頹屋， 亂到阿爸都唔認得， 所以就揾佢幫手搞。 點知2017 年年尾話搞， 佢話好忙， 到過左農曆新年之後再揾佢， 佢又話未得住。 咁我開頭都覺得冇所謂啦， 大家朋友， 佢咁忙。 而我果期又plan 辭工休息下， 到時大把時間。 3 月一路問， 問到我6 月返新工之前先夾到佢上黎度尺。

之後當然又不了了之~

唯有繼續追， 8 月畫好圖， 再覆尺。 訂料， 之後就約9月整，仲要我一早換左屋企部洗衣機先， 請埋no pay leave.  臨前一星期WhatsApp 唔覆， 電話又唔聽。 前一晚同我講話唔得， 好忙， 再遲d.  結果再追， 追到10 月佢都話唔得。 最後夾左聽日， 就係聽日， 又係WhatsApp 唔覆， 電話唔聽， 臨尾一刻先話黎唔到。 

其實對人太好係咪真係咁sad 既報應， 我一早明白朋友呢樣野好死。 但完完全全覺得俾人玩， 諗住好頭好尾盡就佢時間搞掂， 點知係搞掂自己。 太過好人就係被利用完就算。

我心態係等佢覆多一次幾時搞， 如果最後都放飛機就算啦， 佢訂左既料錢一蚊都唔俾， 以後都唔使見， 就咁算， 人生苦短， 唔好蝕俾人同做咩要做呢好人真心對待d 損人利己既所謂fd.

最後講句：唔好太好人， 對值得既人好先係正路！

PS 阿媽想整好廚櫃， 舒服d 煮野食， 結果搞到佢老人家好唔開心， 覺得自己好失敗！

人生最後悔的五件事

5-11-2018 ❨一❩

記得好耐之前睇個朋友share 一個關於統計人之將死，對自己人生最後悔既五件事， 大概係：

1 太勤力做野
2 沒有花時間陪家人，朋友
3 沒有對自己坦白， 想講俾人既野冇講到
4 沒有注重健康
5 為錢而忽略自己既目標，冇為自己既夢努力嘗試過

係呢幾點入面， 我已經睇到自己而家已經後悔既野， 但係我真係無辦法改變， 暫時吧？！ 但我知道咁落去都係同大部分人一樣會後悔一世。

希望自己既計畫可以打破現狀！

方健儀分享

1-11-2019(四)

好好既分享, 我亦都非常之咁讚同, 因為我身邊都有太多好PK既人係朋友圈, 呢D 人係度我都唔想去果D gathering。 所以係咁有限既工餘時間都係唔好令自己唔舒服, 唔去仲好。

不想與X小姐同場　方健儀：何必浪費時間在乞人憎的人身上

上個月有舊同事從外國返港，大夥兒合得來的朋友約飯局，大家把酒言歡話當年，好不熱鬧，吃至餐廳打烊也不願離開。直至其中一位朋友說有卡拉OK局要轉場，熱愛唱歌的我當然也想參與。但當朋友說K局中有一位我一直不喜歡，姑且稱她為X小姐的舊同事也在場，我立即改變主意，更直接地說︰「因為X小姐都喺度，我唔去啦。」朋友都對我的直接報以驚訝表情。

每個人一生中，總有一些人合得來，有些合不來。但不知你是否如是，當你年輕時，對一個人的好惡不會輕易形於色。年少氣盛的我，總希望身邊有大夥兒簇擁着，或是擠在大多數中，生怕被人排斥，生怕自己寂寞。即使同學中有些是你討厭的，有些喜愛炫耀，有些諸多挑剔，你總會「包容」他們，一起吃飯，一起玩耍，因為怕被人負面標籤。

到剛踏入社會，情況也不遑多讓，尤其是以前做記者，最重要是人面廣，脈絡多，「攞料」寫報道也容易些。同事間也講求團隊合作精神，即使某某同事工作如何自私，如何不濟，如何「扮大佬」，我都會叫自己圓滑地笑着跟他合作。我不喜歡X小姐的做事方式，所以對她一直有戒心，甚至可說是討厭，遇上她總有無名的不爽。可是，與合不來的人一起工作，卻諷刺地是很多人工作的一部分。

發展到現在，竟然是做了幾十年人才懂得開竅。每人每日只有短短24小時，很多有意義的事等着我去做，即使是小睡或放空片刻，也比花時間在我討厭的人和事上更有意義。那次直接對朋友說因為X小姐在場，我不參與活動，過後我有檢討應否婉轉些？

但人愈長大，愈不想演戲，與其強迫自己「四萬」般對一些我討厭的人，何不忠於自己？不再偽裝，連推搪的故事也省卻，乾脆說不喜歡便不喜歡。所以現在不論飯局或工作，我總會問清楚誰是同伴才會赴會。

有朋友說，人愈大，知己愈少。我認同！我們的時間愈來愈少，何必浪費在乞人憎的人身上呢？

全文刊於《晴報》，《晴報》facebook

撰文 : 方健儀

留低

27-10-2018 ❨日❩

雖然有個機會去間hea 公司， 工時少d,  又多d 假。 但係我都係決定留係而家間公司， 原因係而家既一team 同事。

我同自己講過唔可以感情用事， 但係有時真係唔係自己諗得咁瀟灑， 始終都係有d 原則， 一黎唔想而家d 同事受晒， 二黎唔當後生再係d 地獄再練習下。

唔知今次機會冇左之後會唔會有， 但我決定左就唔諗咁多， 斷續頂， 冇理由話走就走，要班細既受， 過唔到自己果關。

Good luck to me!

糾結

22-10-2018 ❨一❩

瞓唔著，之前想過既苦惱事情終於都要做出決擇， 朋友話介紹一間福利好d 既工， 估唔到佢今星期就約左佢經理傾話介紹我呢個人去佢地公司。

佢而家要我做決擇， 到底想唔想去佢果間公司， 因為果間野真係好難得先請人， 而家咁岩有機會。

而家做緊既呢份工其實同以前都爭好遠， 相對輕鬆左， 同埋真係同自己同事兄弟班， 有咩大家一齊拆掂佢， 又唔會斤斤計較， 講到尾就係真係對呢team 或多或少有左d 情意結。 以前諗， 點解d 人係一間pk 公司可以咁挨落去， 而家終於明白， 有時有d 野真係話唔埋， 當你係局入面， 真係會有d 唔捨得， 我都有d 難為情， 我到底係度諗乜㗎。

媽， 我真係好亂啊， 個心真係好困擾><"""

應謝警察

21-10-2018 ❨日❩

老父有老人痴呆， 家人已到餐廳，叫佢自己行落餐廳食飯， 點知佢走失失左。之前佢都可以自己落樓下餐廳， 完全認得路， 點知今次佢唔記得左路， 電話又唔知點解靜左音。

我由屋企附近揾左2 個幾鐘， 途中又不斷call 佢， 希望佢可以接到我電話， 當然都係冇聽到。 最後屋企人報左警， 警察上黎屋企登記資料同拎我老豆張相。 搜集左10 分鐘左右就call 晒d 我住果區d 同事去揾我老豆， 佢地再車埋我去屋企附近揾。 真係感謝主！ 係出車途中就係一條街發現左我老豆。 佢迷迷糊糊咁係街度來來回回咁行。

當中要感謝警察， 我媽已經緊張到有d 唔舒服。 佢地一行四人未上黎我地屋企已經係附近揾左我老豆一段時間， 仲要係中午最晒既時間。 上到我屋企安慰我屋企人， 同埋好快咁通知前線同事去幫手揾， 另一邊就去睇樓下同附近有既cctv,  好快係cctv揾到我老豆行左既方向， 亦都好好彩一出車冇耐就揾到我老豆。

呢次教訓我要24 hr 揾人睇實老豆， 唔係就又會唔見左人。

PS 冇所謂政治成份， 真心多謝幫我揾返老豆既警察！

放假又係瞓覺

17-10-2018 ❨三❩

難得既一日假， 不過真係好攰， 瞓到12 點醒食野， 又瞓， 醒左食飯， hea 陣， 洗衫， 又準備瞓。

呢d 就係做到攰到爆， 放假瞓餐飽既工作奴隸生活， 太攰唔夠瞓個人都有好大既冇力感。 到底幾時先可以現狀打破，突破盲腸？？？

自制困擾

14-10-2018 ❨日❩

早幾日之前既工作助理❨佢大我起碼10幾年❩打俾我， 話佢入左間大公司， 我真係好鄧佢開心， 因為新既公司人工高福利好， 又多假期， 返5日。 最正係咩， 自由得黎唔使受氣。

話說同佢共事果時都幾慘， 我同佢又係去左一個地獄， 係唔係都俾個on9 上司X, 真係人都癲，日日返去都提心吊膽。 而我呢個助理我更加同情佢， 大人大姐久唔久俾人怒插。 問題係我地都盡力做野， 係OT 果度唔係咁妥協， 盡量收工時間後一個鐘頭内閃人。 最慘佢個女又得幾歲， 老婆又冇做野， 負擔都真係唔細。 最最最慘係佢洗腳唔抹腳， 月月清好大駛。

而家佢除左轉左好工仲有間公屋住， 真係開心。 而佢打黎仲有個消息同我講， 提起之前成日揾到好工既朋友， 佢又轉工， 而佢下個月last day,  話叫佢介紹我去佢舊公司， 5 day 自由唔受氣， 其實我都知道果間野好野黎， 之前未揾到工都有send 冇聲氣， 而家好似有個機會， 但係。。。。令我有少少困擾。

真係困擾， 我内心呢幾日係度天使同魔鬼咁， 好似撞牆咁。 話說而家呢份工工時同以前差唔多， 舒服左少少， 但係都係辛苦。 不過唔同既係， 而家成班同事都係兄弟班， 大家一齊挨， 又有講有笑冇咩野唔講得。 雖然做左4 個月， 我走既話佢地就會辛苦好多， 因為而家條team 我第2 最有經驗， 我都頂唔少野， 所以我走左肯定佢地食唔少， 如果咁走左係我覺得自己好冇道義。

那邊廂， 你冷靜d 啊， 果d hea 唔係咁易揾， 百年難得一遇既機會， 你又工時少d,  假期多d,  人工都有機會高d,  呢個咪你一直想揾既工囉， 仲使諗！？

呢個仲未發生既事情都搞到自己咁困擾， 我真係做野做到傻左><"

香港劏房感受

11-10-2018 ❨四❩

之前就係睇左有線電視果個劏房住客訪問， 現場直擊最真實既情況。 睇到入面d 劏房惡劣情況， 真係覺得香港點解可以仲有d 咁恐怖既情況， 好心傷， 好鄧住緊果d 劏房既市民傷心。

話說小弟1997年至2001 年都住過判房， 由一間80尺搬去100 尺左右， 再搬去兩間劏房120 尺左右， 係呢3 轉搬屋既情況都係一家五口住，共用廚房同廁所。 講緊都係已經17,18 年前既事， 估唔到今時今日既香港， d 劏房仲恐怖過我細個住既劏房。 細個果時住呢d 地方真係好驚俾人知道我住邊， 提都唔敢提， 仲要同埋7,8戶人一齊住， 遇著d 麻煩人真係難搞， 大家都黎自五湖四海， 又多變態佬。 D 雜物多到爆， 一袋袋膠袋， 真係大吉利是火燭起上黎就一鑊熟。 直到2001 年終於派到公屋， 我地全家終於有一個屬於自己既家， 唔使同人爭廁所， 果時第一次入去完全唔夠膽相信係真既。

時光倒流完，返番黎今時今日呢個香港。 入面個婆婆66 歲， 為左少少尊嚴要果個獨立廁所。 Dklm 睇到果個環境， 40尺房加多個廁所， 仲要係極度惡劣， 門都閂唔到， 門口有條喉漏水， 跨過去之後先入到間房， 仲要係咁有異味。 呢d 房點解可以差過我以前細個d 多， 20年前既香港竟然好過今時今日既香港， 或者20 年前既香港有仲差既， 咁仲衰， 即係而家既香港住屋問題情況係更差。

我原諒唔到一個號稱世界經濟城市既香港， 有d 咁既情況。 一個老婆婆唔係偷又唔係搶，晚年去做保安自食其力卻要得到咁既生活。 香港人工作壓力大工作時間長， 想有個正常d 既地方休息下， 一個小小既空間都冇， 到底係邊個做成個社會咁？

劏房劏到咁污糟邋遢， 所謂賺到盡， 咁先係叻咁先係醒目， 社會亦都認為買到樓就係傑青， 香港人， 人生就係為層樓， 之後再買多層劏劏劏， 吸社會最低層果d 既錢， 我自問唔係咩聖人， 有邊個唔鍾意錢， 但係君子愛財，取之有道， 做人有返d 良心好。

香港悲哀-劏房

9-10-2018 (二)

劏房戶與廁同睡眠

2018/03/13 06:05

坊間的劏房越劏越細，有業主為滿足市場需求，還戶戶加裝一個「獨立廁所」，就可以租貴數百元，究竟一個三、四十呎的房間，廁所可以間到多盡？住客又怎樣生活？

66 歲的玲姐每天下班，就會回到這個四十呎的房間。所謂獨立廁所，就是一進房門，這個不夠十呎的地方，裝了個馬桶，再踏一步就是全屋的活動空間。洗衣服、洗蔬菜都在這裡。

類似馬桶和睡床相連的奇則劏房不乏供應，都標榜有獨立洗手間、五臟俱全。玲姐說是看街招找房間，記者也試著去找。這張寫著有獨立廁所，另一張說是免佣套房，打電話去問問。真的嗎？上去看看。去到出租單位，業主還安排一對夫婦同看租盤。所謂洗手間，就是用木板將床隔開。這個 667 呎的單位，八間房都有所謂獨立廁所。

既要好租，又要盡量多間出房間，結果房間就越來越小，馬桶跟床相連，衛生環境都是問題。這個單位間了十一個房間，屋宇署去年已經發出清拆令，列明有僭建、有劏房，間隔亦無足夠耐火結構。環境這麼差，玲姐還能忍受，都是想有個廁所，維持生活的基本尊嚴。

玲姐有高中學歷，年輕時要供養父母，花掉所有積蓄，現在靠做保安維生，雖然有廁所的套房不少，但也不敢找好一點的。要呼吸新鮮空氣，她唯有放假時到公園坐坐。

http://cablenews.i-cable.com/ci/videopage/program/122506243/%E6%96%B0%E8%81%9E%E5%88%BA%E9%87%9D/%E5%8A%8F%E6%88%BF%E6%88%B6%E8%88%87%E5%BB%81%E5%90%8C%E7%9D%A1%E7%9C%A0

年青有抱負既同事(二)

2-10-2018 (二)

話說新黎既同事好積極做野， 目標係要做經理， 所以話佢有抱負， 咁我當然好鼓勵佢， 難得年青人咁有上進心。

佢仲有一個目標， 就係買樓， 而就係因為呢個目標， 佢好努力儲錢， 真係好慳咁使， 甚至幾十蚊既玩樂消費都唔捨得使。

我覺得因為買樓呢個我覺得唔太值得追隨既目標， 我指現階段唔係值得既目標， 而令自己既思想變得咁狹窄， 真心鄧年青人心痛。 我自己覺得人生有太多野值得追隨， 即使追隨唔到都唔可以俾大眾或社會一直灌輸既成功，即係買樓限制自己思想， 因為現實你冇得一時三刻可以改變到， 但係你自己既腦同思想係最後既防線， 連個腦都俾社會洗埋年青人就真係好可悲。

講返轉頭， 呢位同事已經開始覺得做經理條路唔易行， 呢幾個月佢已經發覺好多有實力既人都升唔到職， 而升到既都係d 埋到大佬堆既。 加上工作上佢仲有好多野未係好識， 於是佢成日大小事務都會打俾我問。

除左工作外，就例如放假想做下運動， 租單車幾十蚊都唔捨得使， 話浪費左。 於是我建議佢去沙灘游水或者跑步打籃球之類唔使用錢既活動。 佢自己都覺得自己好矛盾， 點解自己會咁樣樣。

買樓係咪全世界唯一既目標？ 可以令到d 人咩事都諗起買樓， 我好認同個同事節儉既習慣， 但係去到影響自己生活既太慳又好無謂， 果幾十數都已經令你咁困惑， 同埋佢淨儲錢咩投資都冇做， 咁就更加死火。

於是乎我建議佢揾d 唔使點用錢既興趣， 例如自學樂器，打波之類， 同埋拎小部分錢出黎投資下， 感受吓d 投資氣氛， 唔係d 錢就蝕俾通漲。

一個大好青年， 買樓呢d 目標應該佔佢思想上既小部分， 其他多d 用黎揾自己興趣目標同埋增值自己好過， 慢慢儲錢投資等機會啦。

我本身咩住一大筆銀行貸款， 仲有差唔多兩年先還晒， 仲要係每月一半人工， 都未驚過。 仲可以請屋企人去旅行， 享受下人生， 唔使下下為左買樓而咁擔心， 過左兩年後又係一條好漢。

辭職後獲公司挽留

29-9-2018 (六)

好文分享

你有冇試過辭職後被挽留？結果又有冇留低？

朋友喺雜誌社工作，因為分配工作唔公平嘅問題，一早萌生去意。眼見肯做嘅同事忙到死，卸膊嗰班就繼續呃飯食，內心自然不是味兒。終於佢立定決心遞信，然後──獲公司挽留並答應會處理問題，結果佢開開心心留低並過返正常嘅生活……一個星期咁多。之後歷史不斷重演，公司情況還是老調子。

本身有兩間公司叫佢去Interview，不過因為答應留低所以冇出席，加上已經辭職一次，令佢開口講第二次Resign嘅難度增加，亦唔好意思辭完又辭，最終都係死死地氣繼續忙，而呃飯食嘅同事亦都回復原狀，喺天堂過咗一個星期之後，都係要落返地獄，如夢幻泡影。

一個人會厭倦自己嘅公司，相信都唔係單憑一兩件個別事件造成，而係一直不滿公司嘅架構、制度、環境同埋文化，日積月累，直至心死。上述嘅因素往往係冰封三尺，非一日之寒，你選擇留低，就要有心理準備唔會改變，最終改變嘅只係你心態，即係接受現實。

做咗Recruiter咁耐，好了解公司挽留一個人嘅原因，其實對方想你留低，並唔一定因為你無法取替，只係因為請一個人太煩，教一個人太攰，要一個新人無縫接軌Pick up工作兼且會長做，實在太高難度、太冇保證，牽一髮動全身，搞到主管又搞到其他同事，不如畀少少著數你收返封辭職信。咁到底係為公司好？定係為你好？答案已經好明顯。

我自己曾經有兩次被挽留嘅經驗，留低之後嘅結果都係後悔，其實我一個人留低，點可能令全公司改變？唔理你係Junior定Senior，呢個都係定律，因為一間公司嘅風氣牽涉到太多人，太多傳統，所以我唔會畀呢種事再發生喺自己身上，豁出去係冒險，不過留低係坐以待斃。

公司留人，未必代表你好重要，所以去與留，唔好睇公司，而係要問自己：其實想要啲乜嘢？追求啲乜嘢？公司唔會因為冇咗任何一個人而停止運作，但你嘅人生會因為一個決定而錯失更好機遇。

https://hk.jobsdb.com/en-hk/articles/%E8%81%B6%E7%9E%B3-%E8%BE%AD%E8%81%B7%E5%BE%8C%E7%8D%B2%E5%85%AC%E5%8F%B8%E6%8C%BD%E7%95%99-%E4%B8%8D%E4%BB%A3%E8%A1%A8%E4%BD%A0%E7%84%A1%E6%B3%95%E5%8F%96%E6%9B%BF

朋友間借錢

14-9-2018 ❨五❩

呢排真係攰到仆係度， 成個星期冇做運動， 長期處於眼瞓狀態。

係呢個時候， 有個10 幾年冇見既朋友， 係一個WhatsApp group 到揾返我吹水， 吹吹下問我借錢，我當然好爽快咁拒絕。

關於朋友間借錢呢個問題， 講真好簡單， 所謂君子之交淡如水， 大家既友誼盡量唔好建立有關於金錢上既， 都有幾個原因， 借果個9 成都係冇咩好下場， 你做好人唔係咁易

首先， 其實開口問人借錢果個呢， 先唔講咩原因， 都要過左自己個心理包袱❨如果有的話❩, 突發事要應急果d 覺得ok 合理既， 但係如果因為使大左， 賭錢之類果d 就唔該唔好搞咁多啦， 呢個係無底深潭， 借出去就肯定冇回頭， 同埋其實都係害左人， 等佢覺得玩完使大左有咩事都可以揾人借錢。

如果情況你覺得ok 既， 真係要幫既， 我自己覺得個數要你自己可接受範圍， 幾百幾千果d 就借一野， 幾萬十幾萬就當然咪玩啦， 同埋你真係行左借出去都真係真係預左佢唔會還， 因為你追人還錢仲慘過做咕哩， 你試吓問人還錢， 有時都唔知點開口， 講到尾追人還錢真係有苦自己知！

講返轉頭我呢個10 幾年冇見既朋友， 佢原來周圍呃呃騙騙， 成q 日話投資， 又咩開外圍要資金預埋你一份， 有人俾錢話投資， 過幾日就話已經輸晒， 仲要人交咩爆倉墊底費唔知幾萬蚊， 話已經幫人俾左， 叫人鬆動果時先還， 真係粗口都黎， 擺明係一個職業騙徒， 唔熟唔呃， 呢d 人梗係祝佢冇好下場。問人拎錢投資， 仲要最後話借錢俾佢果個爭佢錢， 債主變債仔， 厚顏無恥就係呢d 人。

所以如果人地問你借錢， 最好就唔好借，真係分析過後覺得要幫要有心理準備：
1 D 錢既額度對自己黎講跌左都唔痛果d
2 預左收唔返， 所以第一個條件好緊要

最後都係最好唔好借， 做一下無情既人， 好過之後做一個有苦自己知既人。

兩個中學同學

10-9-2018 ❨一❩

上星期OT 走， 收工係街撞到個中同係間小食店買野食， 佢中5 畢業就出黎做野， 打過好多份工， 最後做左d 電訊公司店既經理， 月入40至 50 幾k,  都咪話唔勁， 我地d 大學畢業仲要爭銀行錢既都揾唔到咁多， 佢就已經打左10 年有多既工， 仲要係荃灣買左新樓， 下年入伙。 傾傾下佢仲講有個中同係附近開左間地鋪賣野， 叫我去探下佢。

之後我就走去間野度同另一個開店既中同吹下水， 呢個同學先有歷練， 中學畢業之後返大陸讀日文， 識左好多人， 不過佢因為某d 原因有d 精神既問題， 要食藥， 但佢好L 堅就係識親d 女都好有錢， 仲要養埋佢。 冇做野兩年， 仲要成日過澳門賭錢， 開頭贏幾十萬， 之後倒輸返幾十萬， 咁先知驚唔敢再賭。

再之後佢先講之前有d 問題係因為俾d 層壓次推銷洗腦， 搞左好耐先可以重新做人。 而家佢係因為返大陸睇到有d 商機， 然後返香港做代理開鋪， 佢好辛苦先揾到人肯注資落去， 自己都成副身家放埋落去， 一條友撐住間鋪。

睇到呢兩位同學都咁積極佢地既人生， 我都唔可以咁頹先得， 希望大家都有個好將來。

超級攰

6-9-2018 ❨四❩

真係真係超級攰， 坐係度定企係度都好， 都可以hup 得著， 對住電腦差d 釣魚撞爆mon。唔該快d 星期日， 俾我補眠下， 個肝應該爛左一半。

台北之旅

3-9-2018 ❨一❩

剛去完台灣返黎， 梗係有唔想返工後群症， 攰到眼都睜唔開。

詳細情況就唔點講， 但係台灣人真係nice 好多， 俾人好親切既感覺， 無論你幫唔幫襯佢都好有耐性同你溝通。 呢個係台灣最有價值既地方， 雖然佢地建設同經濟都唔及香港， 但人地相對尊重大家， 唔會太過有果d 狗眼看人低之類既眼光。

話說夜市有個男人檔主同我地講廣東話， 跟住我梗係問佢d 廣東話咁流利， 原來佢都係香港人， 同佢一齊睇檔有佢既靚靚身材fit 到爆既台灣老婆同佢地10 幾歲既女。 佢同我講， 邊到揾到錢咪去邊到， 唔使係香港挨得咁辛苦。

呢個檔主真係好野， 好野在佢係香港真係唔知揾幾多， 分分鐘真係月月清仲要住劏房， 冇咩尊嚴咁過生活。 呢個我諗既， 但佢揀去台灣， 開開心心咁揾錢養家， 同太太囡囡一齊享受生活， 呢個先係人生。

其實世界這樣大， 真係唔好困死自己， 可能世界其他地方有你發圍既機會， 俾你大展掌腳。 但我呢刻都係諗無論點都好，邊到都好， 同屋企人一齊就係最好，唯有靠自己努力去過好d 既生活。
下面就係士林夜市照片一張

一家去旅行

27-8-2018 ❨一❩

本身自己唔係果d 話好鍾意旅行， 要咩放鬆吓， charge 下電咁， 所以基本上去旅行都係朋友提議， 之後問join 唔join 咁樣。

自己主動去既真係得一次， 其實都唔知係咪叫旅行， 去美國讀個3 day course 同埋探親， 一去就去左兩星期。

而家呢次特別唔同， 都係自己主動搞， 仲要係全家總動員出發， 包晒所有費用。 錢真係唔可以睇得咁重， 有時真係要同屋企人有多d 共同回憶先得。 希望今次旅程大家都平安快樂， 共同建立更好既家。

心態不足

26-8-2018 ❨日❩

不得不對自己承認內心深處相當脆弱， 特別苦練之後， 運動成績冇好過， 令自己更不甘退步既情況。

黎緊要加多d 訓練日數， 不求與人比較， 但求自己不斷進步！！！

進步進步進步！！！

自己部門經理

20-8-2018 ❨一❩

話說新公司自己部門都過百人， 高級人員就唔少， 除左高級主任， 對上就係助理經理， 經理， 高級經理， 總監 咁樣。

一般都係高級主任落黎搞下你已經好夠有凸， 上星期經理落黎。 其實見過幾次， 冇傾過計， 但今次要多d 接觸， 因為個大佬俾人的左去問責， 變左我第二最老年資要招呼佢， 咁我當然唔會鬆懈， 之前都講過寫字樓d 人真係冇咩邊個係正路少少。但係呢。。。。

呢位經理真係估佢唔到， 事關事無大小佢都X 一餐， 但係佢係插第d 部門， 而唔係插自己友， 我完完全全俾佢行為180 度轉返轉。 正路爬左上去咁高級既位置， 講真理得你前線做乜都好， 唔好煩到我就得， 點知佢唔搞我之餘仲去插其他部門， 呢下真係條氣順左先， 根本好多野係人地做既， 推左個波過黎迫我跟， 個經理就話唔係我地做， 唔準做。 佢仲直接同果個部門阿頭講要佢地做返。

之後坐低傾下最近既工作， 經理問我呢排收幾點， 我話7 點左右， 佢就插我， 做到頂盡6 點半好走啦， 做到7 點即係話咩， 你唔我醒目， 唔識做野。 返8 點， 做到7 點， 搭下車， 前前後後15 個鐘， 瞓教呢， 食飯呢， 邊L 有時間， 早d 返去on99 又好， 乜都好， 做咁夜做乜9, 星期六仲要返全日。。。。。。。

中間仲有好多細節位， 但呢個經理真係我做咁耐野第一個起碼講返d 人講既說話俾我聽先。 我唔理佢係真係假， 至少我個心都舒服d.

政府工作的叔叔

15-8-2018 ❨三❩

因工作關係， 經常性要接觸政府某d 部門既人士， 今次真係要講一個阿叔， 應該差唔多50 歲果d,  好瘦， 半文職要出行巡查果d.

話說佢唔知做乜9 仆街， 真係成個仆到在地上果d 仆街， 要叫車去醫院。 咁岩佢部門架車返左黎， 就車佢去醫院， 仆街還仆街， 仆街到要我陪佢去醫院真係好L 仆街。

說時遲 那時快， 已經到左醫院樓下， 不過個阿叔話有條路直接係門口唔使行， 但個司機話對面上lift 再行過對面就係。 但個阿叔完全冇理佢， 話有條路直接係門口， 好快到， 唔使行， 最後司機幾兇都好， 都屈服係佢煩到爆既指示下去， 因為呢個煩係堅煩。

原來真係有條路可以行少d,  一入門口就係， 咁人地仆左街， 行少d 都好應該， 就係行少左一條應該10 米既馬路。

如是者登記睇醫生，呢樣果樣， 佢形容係一個超高既位置跌落去， 頭暈眼花。其實我聽講就係兩三級樓梯咁上下高既位置仆街， 佢就同我聽到既完全唔同， 不過算啦， 人地都仆街仆成咁。

最正係， 照埋x 光， 醫生話冇事， 佢堅持話有事， 再執著落去。 醫生叫佢坐下， 冇唔舒服就拎藥走， 好唔舒服就講知佢。

醫生行開左之後佢就話呢度果度邊度痛， 又話個醫生頭先個程序唔係好岩， 做得唔好， 要揾佢講下。 大佬啊， 人地醫生都話你冇事， 你自己又唔係feel 到咩大野， 講到人地好唔岩咁樣。 如是者佢堅持左差唔多3 個鐘， 醫生亦堅持佢冇咩大礙。 佢係好唔happy 拎藥走。

我諗， 不如話你因為仆街， 又有絕症， 咁係咪你先滿意， 咁就為左呢個阿叔ot 左 3 個鐘。

PS 真係仆街仆傷左，但係個人就。。。。可能個腦，，， ...

減肥keep fit

14-8-2018 ❨二❩

今日打風間中有豪雨， 唔係講玩， 我好想放工去做運動， 好擔心打風搞到自己收工之後做唔到運動， 因為堅接受唔到自己太肥果隻。

好彩準時放工， 跑左一陣步。 而家攰到企係度都瞓著， 早抖！

PS 希望一路keep 運動， 去返高d 水平。

怒插上司既下屬

13-8-2018 ❨一❩

新公司事情真係起承轉合， 9 成同事都係係怨氣爆炸既情況下工作， 絕大部份時間都係忍氣吞聲。 即係有d 野個上司on9 做d 過份既野， 又唔合理又要求多多， 更pk 就係俾隻死貓人食果d,  咁你係上司， d 細既實會俾面你既。 但係有時過左火， 做上司既你自己會有報應架。

都唔知係咪細個睇得tbb 多， 果d 膠膠既劇情竟然會發生。 話說公司幾個部門20 幾30人開會， 寫字樓又有d 大佬落黎問責， 首先我地部門阿頭簡述完自己部門既事同交代每人所負責既野， 咁就每人講d 好快過左骨。到第二部門阿頭， 一黎就插其中一個人話佢搞邊樣邊樣唔掂， 氣玉就黎啦：

果個下屬應該忍史忍左幾個世紀， 佢用街市擺檔腔吊柒個上司， 係好L 好L L 好LLL 大聲唔L 俾面咁係高層同我地其他部門面前， 怒插：你條柒頭， 乜L 都唔做， 自己就日L 係度X , 有事就推三推四， 明明d 好簡單既就複習化去做， 明明唔使ot 就迫人ot 做， 日日係度睇股票睇片， 9點半出去食早餐， 3點3 食下午茶食到4 5 點。。。。。。 全場人係度聽佢怒插， 最佢一句： 我辭職啦， 你吊第個啦L 樣！
之後佢就走左， 然後會議繼續。

誰是誰非不得而知， 但係呢個下屬佢果種男主角地位係我做左咁多年野最出色既一個， 果種對on9 上司既不滿，公司既pk 制度， 仲有佢利用上司對高層果種恐懼， 直插入心口， 係完美， 用完美都未必能形容， 我好欣賞你， 希望你唔好有精神病， 同埋之後既工作愉快， 多謝你！

進修暫告一段落

11-8-2018 ❨六❩

今日請假考試， 呢篇嘢係考完試食緊最鍾意既海南雞河打既， 咩都唔好理， 食左先講。

好眼瞓啊，轉頭要瞓餐飽先得！！！

兩個寫字樓上司

8-8-2018❨三❩

唔好講笑， 寫字樓d 高層一落黎我都會嚴陣以待， 事關我未試過遇到d 正路既高層， 當然呢兩位都唔例外。

件事就係佢要落黎我做野既地方睇有d 問題， 再夾人去搞。 其實都唔係d 問題， 問題係要我去跟， 其實又唔係d 咩問題， 問題係佢地夾我去夾人， 總之就係要我去做好多野。

同佢地一齊果時， 真心學到野， 不過其實唔使點學， 主要係怒x d 人姐。 點先學到， 就係慢慢爬上去佢地d 位， 有權有勢， 點x 人都得啦！

事情貶下眼又返到office,  個大佬叫我出兩封warming 俾人， 之後就坐左係我附近。兩條友就開始講女， 又話邊到個女同事大波好正， 另一個就話近拆鍾意純情， 呢樣果樣。 你老豆， 我當然係沈著應戰， 唔俾佢地影響， 事關已經5 點15 分， 佢地5 點30分就閃人。 說時遲那時快， 其中一個就大X :搞L 掂未啊你老味， 如果係邊L 到我一早x L 死你， 搞兩封野都咁耐。

我冷不防岩岩就係果時搞掂， 即刻俾佢， 好險啦叫做， 但係都俾佢插左野， 算啦， 預左。 不過呢兩個上司講得下笑都算係咁， 更何況唔使日日對住。

睇黎新公司d 政治玩法都唔係咁簡單， 要邊學邊做， 邊做邊御！

支付寶利息

7-8-2018 ❨二❩

相信好多人都有支付寶， 今時唔同往日， 要係大陸行真係要搞返個支付寶。 而支付寶入面有個餘額寶， 放錢入去就每日派息， d 錢仲可以即刻用。 聽fd 講之前年息有4.1 里， 而家跌到3.7 里左右。

只要你有個大陸銀行戶口加個大陸電話號碼就可以入錢去支付寶買餘額寶。 每日最多一萬蚊， 最大額可以買10 萬蚊， 應覺好正，如果等錢使又可以即時套現入返銀行戶口， 呢個真係抗通漲恩物。 香港人買應該係擔心人仔匯率既風險， 不過邊到怕得咁多， 正路野就咩都試吓。D 擺係度咩都唔使做就有錢都幾好。

年青有抱負既同事

6--8-2018 ❨一❩

話說有個同grade 既新同事， 佢岩岩升左唔夠一年轉左過黎呢度， 其實大家職級一樣， 無話邊個大d,  只不過我經驗多佢少少咁解。

而佢就好有抱負， 話要升做經理， 要點樣點樣， 我就當然叫佢加油啦！ 不過係我同佢上面仲有個高級既， 而呢個高級既上司只係senior,  未到經理， 對工作好有熱誠， 而且超級盡責。 又好鍾意考下大家d 行業知識， 有次新同事俾佢問到口啞啞， 最後我幫佢解圍。 不過其實過程係輕鬆愉快既， 呢個senior 好耐心咁同佢講解， 好在咁岩我識姐， 一額汗。 而新同事都好開心， 因為成日透過呢d 討論， 佢可以好快學到好多野。

呢d 事真係令我諗起自己岩岩出黎做野， 真係冇新同事咁好彩， 遇到我同呢個senior, 好肯教佢又唔會俾壓力佢， 學得快之餘大家又開心。相反， 令我諗返之前寫過佢既pk 前經理， 係唔係都笑你唔識呢樣唔識果樣， 教你就阿之阿jor 摩洛哥， 真係挨左唔知幾耐。

其實你教識個同事都係幫你手， 根本冇必要去挖苦人地， 唔使怕人地resign走， 因為如果條友要走， 根本係留唔住，控制唔到。 倒不如好好教佢， 等自己多雙手做野好過。 你搞到d 辛苦， 頂唔順去， 到頭黎咪又自己受返。 不過呢個世界咩人都有， 有d 做細既真係練精學懶， 我當然唔會俾佢好過， 不過點都好， 大前題我就係想大家工作愉快， 令大家少d 壓力咁渡過呢d 咁慘既工作日子。

至於呢位新同事你要加油， 將來要做經理， 唔使成日話我好快升高級升經理， 因為我真係唔志在呢d,  我本身勁討厭呢份工， 普普通通每年加d 人工已經足夠。 我希望係你升咩經理前， 我就退休唔使做， 哈哈哈哈哈哈！！！！！ hahhhhahahaaaaaaa!!!!!

聽朝記得準時返工><"

做到有抑鬱

5-8-2018 ❨日❩

At 17 既盧凱彤今朝跳樓終結自己短短32 年既一生， 本人好鍾意佢既歌， 而且佢彈結他既技術了得， 真係深感嘆息。 RIP

而尋晚同朋友打波，中間朋友S 傾計傾傾下佢講佢老婆帶佢去睇左幾次醫生， 原來佢患左抑鬱症。 完全冇諗過佢平時好少講野會同我透露佢有呢個病， 而且佢為人平和又好少表達自己感受， 應該係屋企發生左d 野令佢老婆發覺佢呢個病。

而當中最主要原因係佢份工， 佢話想裸辭， 頂唔順， 得打波開心少少， 基本上9 成時間都係失落。 聽到呢度， 為左份工而人生係咁真係好心酸。

所以我決定搞d 活動去維繫大家友誼之餘又等佢可以有機會舒緩佢既病。

真係damn sad!

期待假期

4-8-2018 ❨六❩

人生就係要不停返工，諗起都驚， 不過做人點都要正面d,  因為人生流流長， 要珍惜假期， 做自己想做既野。

雖然今日返工， 但係都計畫緊月尾同屋企人去旅行。 其實我唔似有d 人咁話工作壓力大， 辛苦啊要去旅行咁樣， 旅行對我黎講我覺得都好攰， 亦冇話去完旅行個人就好正面好有力工作。

而去旅行既主要目的係俾屋企人有相處時間， 同制造多d 開心既共同回憶。 雖然仲未去， 但我已經決定每年請屋企人去一次旅行。 反正我都唔係果d 辛苦儲錢買樓過艱苦生活供樓既人。 唔使講又俾人笑廢青， 冇所謂啦， 人生有幾多時間係自己可以控制， 無理由為左買樓呢d 野困死自己。

快d 假啦唔該！！！！！！ no pay leave,  冇錢都要放！ 好型啊， 型條L 咩， 係好窮啊！

舊公司的糾纏

3-8-2018❨五❩

因為一d 官司既原因， 仲要同舊公司搞埋d野 , 講真， 以前呢間公司既經理都係超好人， 我知佢好慘， 因為係呢間野到佢都受好多， 而佢從來都唔會x 我， 就算我做得唔好， 甚至我做錯左， 佢都好好咁同我傾。

呢個真係我覺得要還佢既人情， 而我當然唔會同佢講我地d 細既係前線有幾慘， 因為佢年紀大， 基本上都會係呢間野做到退休。 而且自從我2 月resign 左， 之後就每個月走一個人， 仲要係個個都係做得野果d,  其實都唔使問阿貴， 因為呢間野真係好好好好好好好做！！！

希望今次單野完左唔會再同呢間野有咩瓜葛， 同個經理聯絡都係私人理由。

呢個香港， 一係就係一間好公司， 但係就有班pk 同事或高層。 一係就19 到爆既公司， 有一個好上司。 更多更多更多既係一大班pk 事既 19 公司度做， 真係開心到呢！！！

梁啟超話天下第一等苦人係冇工作既人， 第二係討厭自己工作既人。 到底有邊個係呢個出名地獄工作既香港揾到份自己鍾意既工， 又入到好公司有班好同事， 人工又高福利又好， 舒舒服服咁打份工？

發完夢， 聽朝記得返工。。。。。。

東口東面既秘書

1-8-2018 ❨三❩
每間公司都總有一個東口東面既秘書， 新公司都一樣唔例外。

我去問下有冇塗改液， 佢瑞士銀行本票都出埋all in 我， 好L 兇狠咁X 冇， 咁我咪算， 問d 有既同事借。

同事放假拜託我交d 俾佢， 我同佢講同事叫我交俾你， 佢完完全全保持緘默， 即係靜音，咁我咪努力企係佢位等， 坐佢隔離同事忍唔住叫我放低， 咁我唯有放低走人。

都唔知點解去到邊到都總有呢d 既女同事， 真係搞笑。 有d 時候， 你真係要自己調節， 因為香港通街都係呢d 人， 無得頂，yeah!

忙到抽筋

29-7-2018 ❨日❩

不知不覺返左新工個半月， 唔係好長時間， 但真係忙到抽筋。 先唔講平日workload,  仲要應付好多公司內部野同額外高層俾既多餘工作， 唔做又唔得。 再加上新工lunch 真係冇得瞓， 個人精神真係唔係咁好， 經常處於眼瞓狀態。

8月頭要交最後一份功課， 8月中 presentation exam 搞掂就讀完個course,  希望順順利利。 而家進展係0 。 仲有樣可以幾灰同唔情愿既係可能要讀埋master,  呢個真係要另外打返篇野記低佢。

係咁攰既情況下， 我依然迫自己堅持運動， 呢個真係做左野咁耐， 自己仲可以對自己有個交代既一件事， 雖然當中放棄過， 但而家可以keep 一星期 3 至 4 次， 保持一個fit d 既身體， 又唔會整到自己變個肥佬中坑， 自問真係唔係咁頂得順自己身形走樣。

至於投資呢件事， 我都係好hea,  岩岩有5 萬人仔一年期到期， 有51800, 都係唔用腦， 8月頭再買晒國債就算。 反正呢d 錢真係唔等使， 其實要自己諗太多呢d 又唔會， 識又唔多， 可以唔用腦， 低風險就最岩呢刻既自己， 同埋之後有既收益我估自己都係會使左佢多過再投資， 因為有時都要輕鬆d 對待。

8月尾， no pay leave 都要放同屋企人去旅行， 完全冇plan , 只希望平安大吉愉快旅程， 因為預左兩佬實呢樣唔好果樣唔好。

再之後就係好想全力瞓一個覺， 好L 啊💤

補眠日

15-7-2018 ❨日❩

橫風橫雨既一日， 朝早起身跑下步， 就要瞓成個晏晝。唔係既話， 點挨下個星期呢？
正面人生， 好開心聽日又可以返工！

大佬啊， 如果聽日打風就。。。。。。

大陸銀行債券

12-7-2018❨四❩

話說N 年前開左個大陸戶口， 以便回鄉處理d 事， 佢有個網上銀行， 可以進行銀行提供既投資買賣。 我就定期過少少錢， 一年得2.x 里。 再細心睇過佢個網除左定期仲有d 唔保本既浮動收息產品， 都買左少少， 不過我揀保本既年息3.x 里， 唔保本既可以5,x 里。

買晒之後， 先發覺原來有債券呢樣嘢可以買到， 係國內政府提供唔知幾多億俾大陸d 市民買既國債，有分：
3年期❨年息3.x 里❩
5年期❨年息4.22 里❩

於是就買左少少5 年期債券， 我叫佢大陸ibond.  每年執幾千蚊， 夠晒返大陸既開支。

佢不定期某d 月份既10 號朝早8點左右可以係網上銀行買， 黎緊就派息， 諗全8月10 號再入少少。

記得果時買， 網銀超煩忙， 差d 買唔到5 年期， 唔使15 分鐘就賣晒， 得返3 年期， 不過3 年期都好快冇晒。

仲有一樣係如果等錢使要拎返就要俾你投資總額1% 銀行。

揀平電話用

4-7-2018(三) 

新同事爆左既iPhone 

話說當年一畢業就買部貴電話用， galaxy S2, $5千幾， 而家聽落去好似好傻， 5千幾 買S2. 結果係買左第三個月返工影相跌左落山， 執返條屍之後拎去整。 誰不知整返好要4千， 我心諗冇理由咁傻整架， 最後拎住部機走， 個reception 都同我講唔建議整， 所以我思前想後就踏上用千幾蚊安卓機既路線。 第一部華為機1450, 粗用用左兩年幾，跌左好幾次都冇爛， 仲要俾人笑唔知咩牌子， 人地不知幾出名， 係d 同事唔識姐。 再之後就都係幾部千一，千二左右既機。 計計埋埋5年半都用左6000 左右係買電話上， 即係都唔夠人地一部iphone 貴。

除左自己會整壞電話之外， 另一個原因係我自己好多時都唔見電話， 特別智能電話之前既年代， 唔見左電話你冇實實在在手寫果d 電話簿， 基本上你d 電話係會唔見晒。 所以都幾煩， 買貴機損失仲大。 所以而家只用千零蚊既機， 發生咩事都冇咁心痛。

講起電話真係唔提蘋果都唔得， 當年抽唔知第幾代， 好難抽， 全公司人都坐定定係電腦前面喪F5, 拍得住早排黃子華棟篤笑搶飛。 好多都係如果買到就即放賺幾百至千零， 但有d 人就早買早享受， 抽中買返黎自用。 唔知d 人有冇去用化學廁既情況， 果位用最新蘋果手機既同事入左去化學廁冇耐就大叫， 仲要係慘叫， 介乎雞姦果隻。 聽到呢d 情況， d 同事梗係去睇吓點啦。 到冇幾耐佢出黎， 苦瓜乾咁既樣：我部電話跌左落去廁所度啊！

從此以後， 我愛上左呢個同事， 因為佢係呢單野超愈左我，哈哈！
第1時間第一個月已經ko 電話， 比我快2 個月
第2部野貴過我部500 幾
只能說我輸了。

PS 幾日後， 吸糞車條友拎住個透明膠袋過黎， 入面有支長電筒，同埋同事果部iPhone, yeah!

成功人士既定義

1-7-2018❨日❩

到底點先為之叫成功人士？

大部份人應該都係以身家衡量，係我身邊認識而有接觸既朋友入面， 講有錢，分3類：

第一種， 最有貨既係屋企上市公司CEO 個仔， 佢中學已經用d 名牌袋， 我都叫識彎刀，阿地打同新平衡果d,  有d 同學只係識左單佬/扑死你果d 見個有錢同學咩個channel 袋， 真係好大聲咁話佢咩個袋叫遂道袋， 人地有氣質有修養會教你點讀， 又唔會刻意去show off 自己。 人地老豆捐錢去大學都唔知幾千萬咁捐， 都係畢業n 年後有第d 同學發現。 中5 畢業去過佢屋企， 睇到d 相有big 4, 掌門人果d 新年上佢屋企拜年。 呢個有錢同學真係冇咩架子， 又健談， 又玩過一排。 對上一次見面已經係中同婚禮， 佢仲揸架中港車牌既寶馬車到我返屋企樓下。

其實仲有d 應該仲有錢d , 不過真係冇咁熟就唔講， 大概都係係大陸買地起樓果d,  做發展商， 不過都係差唔幾。

佢地都有個無奈， 就係唔鍾意接手家族生意， 一畢業就掌管唔知幾多個億既生意。

第二種，跟住再講下既就係d 屋企有d 貨既同學， 都係有d 父幹， 佢地就鍾意買潮牌， 沖涼馬騮果d 日本風之類， 最鍾意show off 自己呢樣果樣， 事實好多讀書都叻同埋運動好， 仲入到香港隊果d , 文武雙全， 最後梗係入埋名牌大學。就算入唔到香港d 大學， 屋企一定俾錢去外國讀書， 唔使問一定係英國。

我接觸呢類同學最多， 原因係因為運動。 不過事實上好多運動員都係窮等人家。 而呢類屋企有d 錢既文武生， 佢地真係讀書至事業都好順風順水，多數考政府紀律部隊主任級， 再唔係就係屋企俾錢佢做生意， 總之唔使打工。 呢班其實應該係最開心既同學， 我都覺得佢地係成功既。

第三種就係我呢d 父母做低收入工作， 長工時奴隸命既仔女， 有d 其實都係讀書唔掂， 同人溝通有問題， 呢d 真係最灰， 因為佢地之後都好大機會做社會最低層。 有d 就都係讀書唔掂但好醒目， 即係個人好叻仔， 有個同學中3 都冇讀書， 做左判頭， 揾5/6 萬一個月。

係呢類人入面我係覺得有d 人係成功既定義上， 係最值得欣賞。 佢地同我一樣都係屋企冇咩錢果d,  不過佢地讀書叻❨我就讀書廢，副學士再上大學❩ 叻可以叻到會考30分， 我識有好幾個， 當中兩個好fd,  大我3,4 年， 一個做左野10 年已經係一間大公司做左助理董事， 另一個就做左政府d 高層， 總之大家就係一年一球果d 啦。

其實呢篇嘢雖然好似係咁講錢去定義成功， 其實我想講， 第3 類即係冇錢冇父幹， 靠自己努力， 去改善屋企人生活， 令家人無任何因經濟問題而錯過一些事情， 又有時間去陪家人照顧家人， 做自己想做既野， 佢地係打從心里面開心出黎。

開心， 開心就係開心， 冇得呃人。
如果唔開心揾錢揾得幾多都係冇用， 夠唔夠使， 自己一定清楚！

係我心目中， 屋企冇貨， 而靠自己令屋企升左個生活層次， 改善左生活質素， 而且仲係開心咁過生活做自己鍾意既野， 咁就係成功， 我最欣賞既成功， 我追求既成功。

唔知你自己又點定義成功？

永遠既Rock & Roll 巨星

30-6-2018 (六)

黃家駒, 相信都係好多70 至80 後既集體回憶, 大家俾佢影響都唔少, 我都因為Beyond 都去自己學彈結他。 今日係懷念家駒既日子, 一齊聽下佢把聲。

無盡空虛

19歲日警槍殺長官

29-6-2018 (五)

呢單新聞好想post, 不過岩岩記起, 唔講入面誰是誰非, 道德倫理, 只係想俾D 19 經理知道, 有好多年青有為既熱血人士忍你好耐架啦! 最好貼張news 係佢地個位提醒下佢地, DKLM!!!!

你冇辦法離開就要諗辦法解決, 不過唔係一定要KO人地。祝各位正常打工仔有好上司。

https://hk.news.appledaily.com/international/realtime/article/20180412/58062761

【轟動日本】19歲日警不堪長期捱罵 拔槍殺41歲長官

日本滋賀縣一名19歲警員懷疑不滿遭長官不斷責罵，昨晚竟拔槍槍殺長官，之後駕警車潛逃。當局漏夜追捕，於今日凌晨在距離出事派出所約6公里外將他拘捕，案件轟動日本，政府發言人對有執法人員用配槍殺人感「遺憾至極」。

當地傳媒指，彥根市南川瀨町的彥根署周三晚8點多接獲報案，指河瀨站前派出所一輛警車掉進愛莊町的稻田中，署方派員前往查看見派出所上鎖，在內發現41歲巡查部長井本光伏屍辦公桌，頭部和背部有槍傷。

警方調查指死者被人從背後開槍，但現場未發現犯案警槍，同袍大西智博卻行蹤不明，而其配槍的彈夾至少還有3發子彈。警方懷疑大西槍殺長官後，攜槍駕警車逃逸。

直至周四凌晨1時左右，大西在距離派出所約6公里的愛莊町落網。大西去年4月被錄用，今年1月29日被調派到彥根署，由周三上午8時半起，派出所內只有井本與大西兩人一同執勤。傳媒引述消息指，大西一直遭到井本欺負而動殺機。

內閣官房長官菅義偉在今天上午的例行記者會上表示，執法警員用職務上配備的槍枝闖出大禍，「這種事不該發生的，真的令人遺憾至極」。當地警方高層周四就事件鞠躬道歉。日本槍管嚴格，鮮有發生槍擊案，數據指2015年全國僅發生8宗槍擊案。

法新社/中央社

為樓瘋狂

28-6-2018 (四)

之前先講電影維多利亞一號果D 為左買樓而殺人既瘋狂行為唔知幾時發生, 呢排就有全港關注既槍殺案出現。我之前9 吹為樓殺人,傾唔掂數就開槍隊瓜你, 大佬啊, 樓黎架wow! 估唔到咁快出現。

香港既現象就係, 如果有D 兇殺案, 自殺, 之類既fatal 事故, 係唔會有人關心點解咁傻諗唔開, 比較仁心地去睇件事, 而係第一時間討論間樓變兇宅, 間樓炒唔起, 個業主低死果D。

我自問唔係D 咩道德L 去X 人果D, 但係工作上有時會接觸到家人傷亡既事, 其實佢地未必要人幫D 咩, 起碼都唔好加腳落去。將心比己, 點會想聽到呢D 冷漠說話!

例如: 好在單野係公園發生, 唔係又變兇宅><"



https://www.litenews.hk/%E6%A7%8D%E6%AE%BA%E9%95%B7%E8%BC%A9%E6%A1%88%E5%A5%B3%E7%96%91%E5%85%87%E5%81%8F%E6%BF%80%E8%B3%AA%E7%96%91%E5%88%86%E7%94%A2%E8%88%87%E6%AF%8D%E6%AD%BB%E6%9C%89%E9%97%9C/

【香港輕新聞】鰂魚涌公園昨日發生的槍擊案，已證實是家族爭產引起，44歲姓詹女疑犯涉開槍轟4名長輩，導致2死2傷，女疑犯被警方拘捕。女疑犯居住於將軍澳健明邨健晴樓。警方昨晚派出大量警員，封鎖健晴樓所有出入口，至9時45分押解女疑犯到寓所搜證，再在屋內搜出3支懷疑改裝手槍。

自稱首位在國外受訓的女保鑣

姓詹女疑犯開設一間保鑣公司，蓄黑短髮，平日打扮男性化，並聲稱是香港第一位在國外受訓的女保鑣。據悉，女疑犯在過去半年，疑活躍於社交平台及影片串流網站，曾上傳多張手持手槍及匕首的照片，做出踢腿的動作，身手矯健。她亦曾上傳在室內射擊練習場進行手槍槍擊訓練的影片，片中她帶上保護眼鏡及耳罩。

疑長輩趁其母病逝出售外婆物業

初步調查，懷疑詹女逞兇原因是不滿長輩分配外婆遺產不公引起，詹女質疑其母於2015年病逝後，家族成員才打算出售外婆的物業，覺得母親的死與出售物業很巧合，認為不尋常，更質疑母親的死亡涉及醫療失誤，同時認為負責的醫生要為母親的死負責。

疑兇在公司網頁上載的練槍短片。

個人網頁上載投訴文件反映內心憤恨

她又在網頁上載多份醫療文件的圖片，可見她在文件上用紅筆標註認為有問題的段落，或在報告中劃上X，她更在其中兩份文件用紅筆寫上「殺人犯」字句，認為「必須追究當值醫生，還親人公正！公道」根據網頁，她自稱曾向醫務委員會投訴，並上載有關投訴文件，為母親的死討回公道，更指醫院「必須予我和家人合理解釋！」

指醫生安排其母24小時吸純氧是謀殺

她在自設的網頁中作控訴，指母親生前在醫院留醫時，曾被安排連續接受24小時以上吸入純氧，她指「任何正常人，在這樣長時間的病理性吸入100%純氧情況下，都是足以摧毁身體器官，至到衰竭死」，她質疑「這是謀殺！」又指「母親被施行安樂死！」

出售母親的4兄弟妹索價44,444港元

一個疑似是疑兇開設的網店，將其母的4兄弟妹等作為貨品般開售，售價為44,444港元，該網頁並以鮮血作為背景。疑兇亦將與四舅父就財產分配Whatsapp討論賣樓內容截圖，上載到網站。根據有關對話，有人對賣樓的價錢，及將錢分作多少份給那些親人，也有不同意見。

不滿姓魏的男子侵吞母親的財產

網頁資料又顯示，疑犯不滿姓魏的男子涉詐騙及侵吞母親的財產，揚言母親是被他害死。網頁中指3名阿姨及舅父以親情手段霸佔了母親的財產，又埋怨母親在世時，未能與子女同住，「沒有愛，無法生存！」亦指剝奪了其子女，即她的成長機會，更指母親的生命最終被人斷送。

幫大同揾樓

27-6-2018 ❨三❩

由於尋晚個大學同學真係好想買樓， 佢係咁叫我放工幫佢睇下d 地產鋪， 真係好難揾300 萬以下， 不過又唔係冇wow,  有d 就高少少既唐樓， 有d 就係好細既單幢樓。

咁岩我部電話又壞壞地， 順便係ssp買部手機， 路過幫個大同睇下d 地產鋪， 我覺得其實都有d 瘋狂， 400萬 基本， 500 至600 萬就大把， 真係驚驚地。。。。。。295 萬果間感覺最好， 不過唔個賣左未呢？！

買樓投資二

26-6-2018❨二❩

岩岩個大學同學whatsapp 我， 佢睇左屯門430萬樓，一房一廳，近地鐵站， 諗緊買唔買好， 個agent send 俾佢，詳情如下：
首期 86000
里印 12000
佣金 43000
律師費 8000 左右
按揭保險 73960

分25年， 月供15000
分30年， 月供13200

Total 1031000 ❨佢張紙寫錯9百幾萬)

壓力測試 33000 月入
個大同應該 35k 一個月左右， 但係佢左諗又諗唔知入唔入市好。

其實都唔知點解會問我呢d 冇買樓經驗既人， 不過都好多謝佢揾我傾訴， 雖然我唔認為佢買樓係好選擇， 但係佢比較傳統， 點都係覺得買樓係最好。 

所以我認為如果自己計過條數ok 咪去馬， 最緊要份工長做長有， 如果唔係就供唔掂， 佢可以住屋企， 如果租到出去， 根本唔係咩壓力。 佢就都係覺得太貴， 想揾長沙灣/深水埗果d 細單位。

佢補充個單位200 零尺， 一房一廳， 住緊一家三口，香港人真係幾灰， 咁細都住三個人。 或者佢地其實已經好幸福。

話返轉頭， 我個大同朋友好q 勁， 佢已經儲左百幾萬， 而家諗緊買樓， 一個服字！

我呢d 廢青， 就計劃下暑假請全家去旅行， 廢青都唔知幾時先有樓呢樣野， sosad! 

第一份工既經理

23-6-2018(六)

話說2012年畢業果時真係無諗工作呢回事, D同學3月已經send CV 搵工, 我心諗唔使咁急下。點知4,5月唔知邊日exam係canteen  食早餐撞到自己professor, 心諗個professor 做乜春坐過黎, 成個canteen 幾百個位???!!!!

咁我唯有焗吹啦, 阿sir 我好驚肥佬啊, 畢唔到業點搵工啊?  個professor 就自己係度笑, 我就亂講一句有冇工介紹啊? 佢都係冇咩理我, 都係寒暄兩野果D, 心諗好心你就咪坐過黎啦。

點不知考試之後, 佢問我咩咩公司做唔做啊? 我考完梗係想快D 休息下, 我就hea 答佢 好啊!

6月, D 同學都返晒工咁滯, 7 月我先開始搵工, 搵極搵唔到, 有D 搵我in 都冇反應。點知有一日有個人打俾我話阿sir 搵佢介紹我入佢公司, 叫我去in, 佢係我地D 師兄, 不過佢唔係我經理, 佢都跟過我經理咁解。

上左head office in 完, 好快就落前線見經理, 點知呢個經理話佢同我電話in 就得, 真係吹幾句就得左。 我心諗, 唔通個師兄搭左路? 由佢, 反正都有工返。(不過我未見過同埋都唔識個師兄, 之後叫佢L)

話說我堅係勤力同埋好真誠待人, 諗返起真係好傻,其實做野唔係咁。個經理好鍾意同我吹水, 因為佢覺得我講得笑, 又冇咩所謂果D。佢人生就只係做過呢間公司,果時年資10年左右, 成日打飛機同期D 人只係高級, 佢就升左經理, 又成Q日有意無意講自己中五畢業讀書唔叻, 但唔知點解做左我經理。又講自己買左樓, 升左幾多果D><"  其實我就真係冇咩所謂, 但佢真係久唔久講自己冇degree 都做左我經理, 真係成個阿婆咁。

開頭果時, 我真係冇為意, 佢好多時都會whatsapp 我傾計。不溜都冇咩野, 直到我做野果時講左句好攰啊, 佢問我做咩成日咁攰, 我果時就直接話自己仲堅持做運動之類, 以上對答只係好普通傾計, 佢突然之間爆我: 好L 心你返工咁攰就咪L 做運動啦!!!

呢下我開始接受唔到, 呢D係我自己既野, 關你咩事, 我攰但係無影響過工作, 不過我冇出聲。由於我個人抵得諗, 做野又無咩所謂, 辛苦既工作分配俾我都冇問題, 之後佢閒唔時實搵我傾下計。 卒之佢講介紹我入黎公司既L。

L 係你師兄, 佢白痴on9架, 叫佢唔好做果D 佢係都要做, 個人又唔得醒目......阿經理係咁講人地是非。 我只有做有對白果D 咖哩啡和應下, 佢講左半個鐘都有。

佢又講佢係公司點點點, 又話我以前9千蚊人工, 你萬幾蚊好多啦(大佬啊, 你拎舊史同我比><" 我冇你果D 10 蚊碗雲吞麵)

之後就講佢結婚, 請左圍中學同學冇人去, 佢俾我睇D 結婚相, 兄弟班全部都係同事, 伴郎仲係佢前下屬, 升左高級去左第度。有次特登叫呢條友黎玩我, 拎份顧問report 問我野, 我直接答唔識, 呢條友問你唔係大學Full time 讀呢科, 我都係part time讀, 你冇理由唔識。如是者係咁俾兩條友笑左半個鐘><"  (份野其實去到邊間公司都冇人理, D 數都係電腦gen出黎,顧問會搞掂晒, 而家諗返起堅係玩我)

最煩既係, 佢好興收工8 點搵我食飯, 我準備緊去做運動佢就搵我, 我果時又唔識推, 唉, 有呢D上司真係慘! 你以為佢關心你, 其實條友根本冇朋友, 佢所有相處開既人都係公司D 人(事後D 新同事好憎佢, 暗底開group 唱佢, 其實真係自己太好人啦, 當人係fd, 佢請你食飯搞到你做唔到運動, 佢可以claim 錢同埋大把quota, 唉)

D 新同事話佢講野好mean, 我起初都幫佢講幾句說話, 但係, 有次佢當住全部同事係office 講左句好mean 既野, 我有D 野想問清楚, 費事之後做錯, 行去佢度問佢, 佢就笑騎騎咁大聲講: 呢D咁既野都問, 第時你結婚係咪要我X你老婆你先識!

我個人當堂燥左, 但係都掩飾住, 返位做野, 但係我已經即刻上網搵工走人, 因為我真係接受唔到俾人隨意侮辱, 我X你咩, on9 經理!!!

冇朋友, 自high 係間公司10 幾年, 又唔知出面價錢, 成日話我地D 助理高人工, 佢自己低人地好多都唔知, 隨口講mean 野, 仲要人成日講笑tum開心, 香港真係好多變態佬。

期待星期日

19-6-2018 (二)

雖然一早都有心理準備, 但自己真係唔夠意志同毅力, 一返工就少做運動, 仲點敢諗報比賽。

朝早7 點出門口,夜晚 8 點半左右返到屋企, 照計可以落街輕鬆跑個10K, 但係我的而且確被倦意打敗。一返到屋企就坐低想休息><"

新工作D 同事都算OK, 係好多野做, 不過都夾到。但係佢地做野真係好mi mi more more, 連出去食lunch 又慢條斯理, 返office 都係慢條斯理, 同以往既我一到lunch 就快d 食完快d 休息瞓下覺補眠下, 真係唔好睇少呢個午休, 真係救我一命, 事關每日10 hrs 工作都咪話唔lum, 仲要OT 一兩個鐘, 加加埋埋都12 hrs 一日, 自問真係練唔到習做運動。

所以一定要好好珍惜星期日呢 D 感恩日!!!!!!!

揾到新工

13-6-2018❨三❩

經過兩星期既努力， 終於揾到新工。
回想返之前兩個月目標係揾d 5 day 既工作， 願意減低人工去揾， 真係天真到以為咁就可以揾到， 實在低b 到不可想像。

果段時間揾工真係好hea,  總之見到自己行業工作， 5 day 既就send 去，我果行好少5 天工作，但都 send 左10 幾20 份， 結果係得一兩份有得interview,  期間發覺佢地根本唔係想要我果類工作者， 佢地要相關經驗， 呢個相關經驗係exactly 做開佢地本身果範。 即使我做過大型job 佢地都唔想要， 呢個拒絕原因係最現實同我最覺得可接受。

不過， 更多既原因係有d 不穩定迷糊因素， 其中一個我已經可以確定左， 就係識人好過識字， 根本其實係一個局， 入面有d 有權力既人一早已經有人選， 求其揾d 人去in,  之後再揀返果個自己人， 即係份工其實一早就揾左人。
而有一份我就識入面d 人， 我in 完冇通知就問下， 原來請左個佢地一早揀好既人， 我只係劇本既一個咖哩啡。

而另一個不穩定因素連揾工既agent 都答我唔到， 我問點解d 工send 極cv 都冇反應， 佢只係好大範圍咁講左幾點
-HR 好多其他野做， 冇時間理
-份工急請人俾人插爆， HR d 人就求其揀d cv 應付左d 經理先
-可能想集多d cv 再細心揀❨覺得可能性好低， 香港咁急既社會，點會❩

個agent 仲覺得我可以挑戰細公司既助理經理， 叫我試下添， 完全明白佢想我可以見得成佢手頭上d job,  咁先有佣， 但係我有自知之明，哈哈！

最後想要自己記住就係， 真係冇咩工係舒服d,  頂硬上。 自己唔似之前朋友p 識得人多， 好易揾到荀工， 所以靠自己實力先係最重要。 同埋要知道自己想要d 咩， 即係目標。

最最後， 又要返地獄loop 啦><"""

正苦工

31-5-2018 ❨四❩

當你覺得自己好慘好辛苦果時， 睇下呢個世界有d 人到底可以有幾辛苦有幾慘。
多珍惜自己擁有同有感恩既心， 亦希望呢個世界會少d 苦況， 除左上帝，我真係諗唔到有邊個可以幫到呢d 苦人><" sosad!

https://hk.news.appledaily.com/international/realtime/article/20180529/58245092

【日薪無80蚊】絕世恐怖工？ 孟加拉通渠工人搵命博

「厭惡性行業」理應擁有高薪補償，但現實往往不公平，窮人的苦難無日無之，像孟加拉通渠工人，他們要潛入污水徒手通渠，日薪只介乎4.5至7.5鎊（46至78港元），不但回報微薄，更隨時要賠上性命，每年當地便平均有數十名通渠工人死亡。

從一張張相片可見，首都達卡（Dhaka）的去水渠每當遇上豪雨，便經常堵塞及水浸，需要出動通渠工人潛入渠內清理。去水渠不但臭氣薰天，而且內裡滿佈垃圾及人類排洩物，衞生環境可謂極差，又會釋放出有毒氣。

不過通渠工人竟在毫無保護裝備下，潛入積滿污水的去水渠內，徒手清除堵塞水渠的垃圾，有如身處人間煉獄。他們往往連潛水鏡都沒有，只能閉氣工作，過去便曾發生多宗工人在水渠中溺斃的慘劇。工人就算最後能成功出來，但由於長期在衞生欠佳的環境下工作，不少工人最終健康出現問題，甚至死亡。

英國《每日郵報》

重新出發

30-5-2018 ❨三❩
休息左3 個月， 之前好hea 咁揾工，結果當然係揾唔到。係時候要用盡全力揾工啦， 希望之後揾到份ok 既工。

終於搞掂份功課， 仲爭兩份， 同8 月既presentation 就搞掂個9 個月既course,  真係老啦， 讀唔到書啦。

功課/考試

26-5-2018 ❨六❩
真係估都估唔到好憎讀書既我又去讀張cert,  deadline 前趕起份assignment,  黎緊星期三仲要考一個試， 真係身心疲累。

非常非常希望可以pass 到星期三兩個試， 咁我就重生啦！

PS 8 月先完個Course ><""

不要太好人

http://money18.on.cc/wealth/content.html?id=bkn-20180511190559555-0511_00842_001&newTab

吓！研究證實：男人30歲後　再做好人包無發達


外國傳媒報道，近日《哈佛商業評論》有篇文章的結論令人嘩然，並惹起各界別的討論，就是：好人在工作中的表現不如卑鄙的人！

該文章的作者是Miriam Gensowski，為哥本哈根大學經濟學助理教授，研究分析了大約1,500位在1920年代至1990年代期間，由兒童追蹤到老年的高智商(IQ)個別人士，從而得出「做好人包無發達」的結論。研究主要以孩童時的性格、一生人所賺到的錢，以及教育水平，去分析性格怎樣影響男性及女性在其專業上的成功，以及何時會成功。

結果發現：較友善及隨和的男性能賺到的錢明顯低於其他男性！不過，這不適用於初出茅廬的年輕人，僅適用於30歲以上，尤其是年齡介乎40至60歲的男性。至於收入少幾多？研究顯示，在整個人生當中，首20%較友善及隨和的男性，相比其他在職男士合共賺少了大約27萬美元(約210萬港元)！

那麼，這是否印證了小學老師自小教導要「做好人」的教育是錯？再看看研究怎說吧！

哪類男性能賺多一點錢？研究發現，需要同時擁有兩種性格：「外向和認真」或「有好的組織能力及勤力」！擁有任何一方面的兩種性格男性都催向高收入，例如首20%「外向和認真」的人，在整個人生當中，較其他男性賺多60萬美元(約468萬港元)。必須留意，有「外向」而沒有「認真」是不計的。

除了性格，若能配合較高學歷，例如碩士或博士，較僅有學士學位的男性賺得更多。故此，有上述性格，再加上肯讀書，賺錢機會必然增加。值得留意的是，沒有主見、凡事都話好的男性，顯然沒有領導能力，賺錢自然更少！這就是好人在工作中的表現不如卑鄙的人！

這樣看來，研究的結論對你來說或許沒有驚喜。不過，不妨細心反思，日常生活是否經常做「Yes Man」呢？

至於女性方面，個人性格及收入關係就不大，主因是在研究個案中，有大約一半的女性不用工作，不是她們懶散，而是1920年代的社會仍比較封閉。

舊公司一個阿叔

12-5-2018 ❨六❩

最近睇到車位接連破頂成交， 呢d 新聞令我諗返起第一份工遇到既一個同事， 佢係第二個部門既， 因為我要幫所有同事訂制服， 就咁接觸到呢個人，以下稱呼佢阿叔。

阿叔佢165cm 左右， 肥底， 密髮❨應該好多甩髮人士羡慕， 我都係其中之一❩, 一副黑色鋼邊眼鏡。佢keep 得幾好， 皮膚幾白， 保守估計果時40 幾歲。 條友沈默寡言， 係公司冇咩人同佢講野， 就算係同部門都好少同佢講野， 除左公事之外， 佢食煙都唔會同其他煙鏟吹水， 基本上係公司係冇對白果d 咖哩啡散腳角色。 而佢係公司已經做左20 年， 你都咪話唔勁， 不過都只係一名助理， 真係做足20 年助理。 我果時個好pk 既經理❨佢果時公司年資11年❩有講過如果係公司做左十年以上絕對非等閒之輩， 所以係我心中佢一定有佢過人之處。

話說真係好少接觸呢條友， 但係由於要搞制服， 要揾佢， 咁就吹下水：

我： 嘩！ 公司黎講你都算中上靚仔！身材又fit,  著M 碼得啦！
阿叔❨會心微笑❩: ok 咁啦， 你搞埋呢d 都幾多野做wow
我：冇計啦， 鬼叫我做細既咩！
阿叔：入左黎做慣唔慣啊？
我：咪又係咁， 最唔慣咪成日俾人吊囉， 係又吊唔係又吊， 就黎癡線㗎啦！
阿叔： haha!
...................

就係呢段唔太記得既對話， 阿叔對我印象好似幾好咁， 每次見到我都同我打招呼寒喧幾句。
有次有個同事話準備結婚， 計緊使費， 又講買唔買到樓， 我都係入面同佢傾， 唔覺意睇到阿叔望住我地， 佢好似有野想講， 但佢性格係唔會同人講野， 總之佢就聽緊我地講野啦。

有一次落大雨， 真係我的野蠻女友 系列， 我拎住把遮行到公司對面， 見到叔佢❨吊你xx 點解唔係全智賢❩企左係度， 原來佢冇帶遮， 佢企左係度食煙， 跟住又同佢吹水。

我： 阿叔， 我辭左工啦
阿叔：下！ 你做兩年到就走啦？
我：係啊， 揾到間好pay d 既。
阿叔： 年青人， 你地而家真係比我地果d 年代辛苦好多， 我中3 都未畢業就出黎做野，如果係呢個年代我做唔到呢份工， 而家起碼high dip 先做得。
我：咁你唔讀返個high dip 升正？
阿叔： 升黎做咩？
我：高人工d 揾多d 啊嗎
阿叔： 錢呢樣野呢， 我唔係太在意份人工， 我收租都多個份人工好多
我：原來你有好多物業架？ 好勁wow,  屈晒機啦
阿叔： 唔係， 我得車位姐， 以前d 車位好平， 10 萬都有個， 我一個人， 又唔多駛錢， 樓又買唔起， 反正一年都儲到錢買到車位， 咪每年都買個車位， 又唔使供， 幾好啊。
我： 你條友仔原來係披著豬皮既豬， 發到豬頭咁。
阿叔：仲有d 股票收息咁啦， 做咩仲晒錢去讀書， 升職又要俾人吊， 咩重飛有乜謂， 你上司咪成日串你大學畢業做佢下屬，話自己中五畢業讀張dip 就做你經理， 咁你又覺得佢點？
我：er ..... 咁我經理個人叻啊嗎❨咁都講得出口，想嘔❩
阿叔：點都好啦， 祝你新工工作愉快， 遮我返公司啦唔該！

阿返彈走佢飛煙， 之後我地就好浪費咁兩條佬同一把遮在雨中漫步，嚐水中的味道咁行返公司。Gay 到核爆><

阿叔佢係呢間公司企穩陣腳做個咖哩啡20 年， 冇壓力， 夠hea,  有事唔到佢咩， 冇事佢更加hea,  公司入面保持獨立個體， 冇人會搞佢， 為人冷酷， 但又唔會去搞人害人， 佢係呢間咁辛苦既公司可以做20 年真係絕非等閒之輩。

我最想做到阿叔既當然係收息收租多過份人工啦！

阿叔你還好嗎？

尋找理想工作朋友❨二❩

9-5-2018 ❨三❩

一個字： 勁！

話說朋友P 為左高d 人工去左第份工， 不過辛苦程度係舊果份幾倍同整度受氣， 所以做左一個月就再揾。

今日又揾我話揾到新工， 同之前好果份果份差唔多， 人工都係咁上下， 但佢經過呢一個月果份工既洗禮之後， 個方向好清晰， 唔會再為多少少錢亂轉工。

做朋友我當然想佢做野開心， 唔使咁受壓， 祝佢新工一如佢所想。

香港地做野， 試問邊個唔想人工高， 輕鬆d,  無咁大壓力。 但係係呢個咁高壓既社會有邊個唔係為左屋企， 為左生活頂硬上。 希望所有打工仔都可以過d 健康生活， 揾錢之餘有返自己人生。

一個打工奴隸上

電影(維多利亞一號)

7-5-2018 ❨一❩

維多利亞一號係彭浩翔導演， 何超儀主演既電影， 想當年好想去睇， 因為係講香港人買樓既故事，不過忙到套戲落左都唔知。 直至有個sem 天地堂，中間時間就係學校圖書館hea 果時見到有得睇， 就係果時借左黎睇。

印象中一開頭就係有個保安俾人用條索帶纏頸， 自己想用剪剪開佢， 最後剪左自己條頭既血管喪標血， 不過一早都預左彭浩翔會喪用血腥場面去刺激觀眾， 所以都冇問題。

講返主角何超， 屋企住唐樓， 想買間好d 既樓俾屋企人住， 無奈樓價係咁直上， 自己揾既錢都少， 辛辛苦苦用盡一切方法儲夠錢買維多利亞一號， 個心都如釋重負。 就係呢個時候，樓市又造好，業主睇好後市， 覺得可以賺多d,  就取消成交。 係呢一刻既何超最後決定用殺人黎整到個單位做兇宅， 實行同樓市死過。

整個血腥震撼場面就係係個單位入面， 何超殺死晒入面d人， 最後連上門既警察都死埋， 其中一個好似係Juno 演， 何超順利殺人最後只係整傷左隻腳。

之後就係業主好驚放唔到個單位揾何超再傾， 最後唔太記得係咪買左定冇買， 但係電影最重要既訊息就係香港樓市癲到要殺人，令人瘋狂。

2010 年既電影， 到今時今日2018 年既香港， 樓市仲癲， 維多利亞一號既情節真係分分鐘會出現一d 都唔出奇。

拜讀左好多投資網友既投資日誌， 其實樓唔係全世界唯一既資產/投資產品， 係有多種方法同產品， 有時真係唔好鑽牛角尖， 一味向樓果度衝， 唔係最後你既人生真係得一層樓。

練習疲憊

6-5-2018 ❨日❩

剛剛既一星期， 唔知係咪上星期練斜路太攰， 搞到今個星期有幾日攰到冇跑。

今朝跑完14k , 發覺右手手臂有少少痛， 可能係尋晚打波整親， 睇黎都係減低強度， 唔好再整親。

呢排見返好多以前既運動朋友， 好多都話我身型fit 返好多， 搞到我都有d 唔知點， 不過肯定既係， 點都要keep 住做運動。

尋找理想工作的朋友

5-5-2018 (五)

話說有個朋友阿P 做左5 年好舒服既工， 有34k 左右， 有人介紹佢去第度有41k 左右， 咁佢心思思左好耐最後都去左41k 果間。

而家情況係做左唔夠一個月話好後悔轉左工， 已經搭路離開，揾返好似以前果間公司咁， 原因係舊公司有以下好處：

-返工唔使準時， 幾遲都得，只要搞掂手頭上既工作就得
-同事之間相處相當融洽， 大家兄弟班
-超級自由， 冇咩壓力，多私人時間做自己嘢

咁新工又點， 日日俾人夾到爆， 佢又要去夾人， 連用公司電腦上網check 野都俾人照下話唔上得果d 果d 咩網咁，，，，，。。。。❨數以萬字❩

而家真係日日打俾我訴苦， 其實食得鹹魚抵得渴， 你為左多d 錢去做果份工， 正路唔好期望更舒服， 既然發現唔岩自己， 睇下可唔可以揾返以前果份咁上下既。

我想講， 點解我未試過做你舊時果份工， 舊史衝左落海啦，苦笑！！！！

Be a better man

3-5-2018 ❨四❩

外國作家Paul Hudson 係Elite Daily 發表既文章：

25 Ways To Be A Better Man Even If You Can't Be A Perfect One

https://www.elitedaily.com/life/culture/25-ways-better-man/644681


想成為更好既男人，佢發表既其中一點真係有幾多人做到：Quit the job you hate

梁啟超都講過世上有兩種最慘既人， 一係冇工作既人， 二係討厭自己工作既人。

而陳冠希先生講過：If you find a job that you love you really don't have to work anymore.

試問世間工作為何物？ 你愛既唔愛你， 你唔愛既佢跟實你！

有邊個夠膽講自己好鍾意自己份工？

去返be a better man 既其中一點Quit the job you hate.  呢度包含左好多深度問題係入面， 一個better man 有勇氣去辭去一份討厭既工作， 佢要面對辭職後接種而黎既經濟壓力，家庭壓力， 朋輩壓力等。當然仲有日後更多既問題， 但係呢一刻你放下， 我相信你會得到另外一d 機會。辭去討厭既工唔代表要頹廢， 而家要揾自己想要既野， 同用行動去爭取， 唔好放棄。

不過， 做唔到呢樣， Paul 哥仲有24 ways 俾你to be a better man,  唔使供樓啊！？唔使養屋企人？！ 唔使食啊！？ 咁仲有好多be a better man 既方法。 唯有係香港做死一世你唔鍾意做既工❨宣傳易mode:  i love hong kong! ❩

正面態度

2-5-2018❨三❩

最近發覺身邊有幾位朋友佢地除左自己工作外， 自己既副業都搞得好好， 有d 仲高過而家份人工， 而佢地有幾個共通點， 我相信係佢地成功既要決， 希望記低佢提醒自己。

1 行動力超強：
佢地腦入面諗到點做就即刻寫低佢， 可以做既就即刻做，即使唔可以即刻做都會想辦法盡快做， 仲要係自己set 既限期完成。

2 堅持：
呢個真係唔係人人做到， 佢地開頭好多都俾人睇死， 但佢地唔會理， 相信自己可以做到既， 有無比既毅力去keep 住做， 唔係一兩日既事， 係3,5,10 年既計劃。

3 遠離酒肉朋友：
影響到自己退步既朋友佢地都唔會浪費時間去相處， 注意力集中係自己既事業或興趣上， 不斷進步。

4 說不：
Say no 唔係人人做到， 佢地會好堅決向一些人或事說不， 例如一些無聊飯局， say no 後即係自己善用左時間去做自己既野。

5 正面思想：
佢地起初創業都係付出自己既時間多於金錢， 所謂萬事起頭難， 但佢地都好正面咁面對種種困難， 認為做都係輸少少錢同時間， 但哪怕會有一日解決晒所有問題， 相信豐盛收獲會係結果。

以上5 點係打黎提醒自己， 當然仲有好多要做， 不過先做到呢5 點， 我相信自己一定會進步更多！

方向

25-4-2018 (三)
呢排keep 住interview,  希望最後可以揾到份岩自己既工。見工有好多嘢想講但又唔知點講， 下次開一篇淨講見工。

現階段食緊儲蓄，當然唔可以長遠落去，始終要做野，不過經驗話我知， 唔好急， 唔係好易奶嘢。雖然而家已經有工請我， 但都唔會考慮， 因為同之前果d 一樣性質， 做過三間公司， 三間都係伏。

趁呢段時間慢慢一步一步搞自己網上既服裝生意， 建立真係好難， 不過唔可以放棄， 呢個係我自己其中一個方向。

而另一方面， 我睇到大陸市場真係好有潛力， 就算你話唔鍾意大陸都好， 大陸經濟真係起飛得好快， 亦同一個做緊大陸生意既朋友接觸， 佢做網購都淨賺3,4 萬人仔一個月，建立左兩年， 呢個成績真係好過好多打工仔， 佢就係睇中大陸咁多億人口，商機處處， 所以呢度同佢都有個計劃， 希望工餘時間可以打開大陸市場。

最後， 都係要揾份岩既工， 要儲子彈， 等待機會。

而最終最終都係想做生意， 不過呢方面要2 年幾後還晒錢先start up 到。

買樓投資

20-4-2018 ❨五❩

岩岩新鮮熱辣陪朋友去收樓， 200 零尺開放式， 買果時36x 萬， 而家已經42x 萬
盡快收樓，盡快放租。

天啊， 普通香港打工仔到底要做幾耐先可以儲到80 幾萬， 買樓啦！ 點先發達， 買樓啦！窮一生心力就係為左買樓， 如果月月供款壓力大， 你份工幾q 受氣都要挨落去， 好大機會成世人都係同銀行，地產商打工。

而呢個遊戲係華人社會根深蒂固， 為左賺到盡， d 人就買樓整劏房， 有咁細得咁細，唔好理佢安全問題， 收到租+樓又升 就得。我唔理你係咪社會低層收入幾少都好， 總之我要賺到你盡。

中間呢度個問題就係， 你愈來愈過份既時候， 業主係揾到多少， 惡性循環， 底層當然係最慘， 無錢， 幾殘幾舊幾危險幾冇尊嚴都要租黎住。 業主你以為自己賺左， 感覺上好似好正， 其實最賺果d 地產商就最開心， 多謝你推高d 價， 你自己d 回報其實一年少過一年， 當然你話層樓會升值， 我唔係專家， 你夠薑而家再買， 根本你層樓買左要放就等3 年， 唔係俾稅都收你皮。 其實本身收租果d 業主， 再用上增值自己資產都已經係難上加難， 呢d 都係果d 劏房收租佬自high,  你買黎投資， 收租一年2里左右， 真係俾人笑， 不過又會俾人笑返轉頭， 你呢世都買唔到樓。

阿叔3x,  同家人住公屋，而家過住廢青生活，揾工中， 好想同d 年青人講， 唔好俾層樓呢d 全世界唯一理想困住自己， 世界係無限大。

我單純d,  低b d 咁講咩投資都唔識， 你有筆錢儲左， 假設有住屋需要， 做定期用d 息去幫補少少d 租 都好， 元朗遠少少有村屋租7000 幾 700尺 3 房啊大佬， 咁你會繼續做野有收入， 進可攻，退可守， 因為你份工好辛苦果時， 你要供樓真係幾惡頂都要做落去， 你唔夠膽辭工。你俾d 租有自己生活質素， 思想都正面d,  工作之餘要有自己人生。

不過普遍香港人都會話我傻仔， 個個月俾7000 人地使， 一年冇左9萬, 我真係唔識講， 但我絕對唔建議身邊朋友係呢個階段買樓投資， 自住有需要除外。

有家長600幾 萬full pay 幫個仔買樓， 真係得啖笑， 呢d 野佢地寵個仔去到呢個地步，真係唔知佢第時受少少人生挫折可以點。有d 話拎黎投資收租， 回報2 里幾3 里租咁低都滿足， 真係好野。唔講股票，債券，不如做定期收息，4 里都 2 萬一個月，一年24萬， 你個仔一年唔使先係13 萬左右， 每年俾24 萬佢租樓加使好過。

買樓啊！買樓啊！

體能上升 心態下滑

19-4-2018❨三❩

尋晚同今日練習覺得進步左
星期二晚
斜路x 10, 每隻快過之前10 秒左右

星期三
300 x 8, rest 1min 40sec
Around 49~51s each
收晒貨


早排玩高風險野，冇左6 皮
做人都係踏實d好， 重新黎過， 真係要告誡自己><❨就係咁影響晒心情❩

中速斜路練習

12-4-2018 ❨四❩

繼尋晚籃球比賽輸波，自己打得唔係咁好， 心情唔太好， 今星期又有田徑比賽， 於是又去練斜路。

2min 斜路x 11

加埋jogging 都成個幾鐘， 好攰啊！

揾廠訂造產品

11-4-2018 ❨三❩

搞左自己個品牌個幾月， 進展好慢， 而家得兩種產品出左黎， 雖然都幾滿意， 但始終太少產品。

呢排揾廠都煩到爆， 下下都要做一千件先有得傾，我呢d one man band 100 件都食唔晒， 真係有d 難搞。

睇黎都係急唔黎

斜路練習

10-4-2018❨二❩
尋晚練左10 轉 2 min 斜路， 耐力練習， pat pat 痛到， 仲要今日瞓到好晏先醒。

2min ramp X 10 ❨70% power❩

夜晚上完堂， 10 點返到屋企， 都係珍惜可以全力練習既時間， 就即刻換衫跑4 轉全速斜路

1 min 19
1 min 15
1 min 12
1 min 12

好攰， 但好滿足， 希望黎緊比賽有好d 既成績， 慢慢上返中上水平！

意志

9-4-2018 ❨一❩

發覺自己既意志同毅力仍然唔夠， 創立自己既品牌服裝， 再之後希望能夠同伙伴創立家俬生意， 唔使太急， 每日目標前進1%,  一年就365%,  努力朝住自己既目標進發！

Interview

27-3-2018 ❨二❩

今朝interview 燥燥哋， 3 條友in 我， 答咩都錯，答咩都唔滿意， 又笑下你d 學歷

問：點解你辭工要揾呢份工
我：想轉環境
問：呢個講法我完全唔接受

心諗❨你要我作個你好接受既， 有邊個唔係想轉環，答左幾條問題都已經串9 我❩

之後同d 同行分析下， 佢地話其實佢地本身已經揾左人， 係咁易in 下其他人

算啦， 反正你唔like 我。我都唔like 你， 大家都係唔做同事好過

辭職原因

17-3-2018 六

當然仲有其他原因， 不過馬雲已經中晒主point! 

遊車河

18-2-2018 ❨日❩

新年冇咩野做，問同事借左架車揸，兜幾轉吸下d 運氣， 計計下都成3 年幾冇揸車><

不過真係唔係想像中咁開心， 首先拎車果時， 條街多車到， 樓下停車場都爆晒，真係你肯俾錢都冇得泊， 超多車超塞。

同埋自己太耐冇揸車， 連泊車都唔識泊， S 位唔使講唔識泊， L位勉勉強強，真係大壓力。今次同朋友揸左去深井，屯門， 最後晚上元朗食泰國菜， 總算旅程平安無事， 人車安全還車俾返同事。

香港揸車真係有三大：1支出大 2 怒氣大 3壓力大
同外國果種感覺差好遠，我係泰國同美國揸過， 感覺好relax,  anyway,  新一年揸左轉車， 希望可以開大運！

收爐

15-2-2018 ❨四❩

做到年三十晚收爐， 唔知點解心情真係好差， 希望d 衰氣冇晒， 新年有個好開始

嫁俾公司既同事

14-2-2018 ❨三❩

公司有一個大家姐， 應該一畢業就係公司做到而家， 岩岩拎左長期服務獎❨估計10 年❩,係同我同一部門， 不過唔同工作地點， 部門經理對下就係佢， 佢係部門第2最大。

話說入左公司幾日之後， 經理就係寫字樓落黎揾我食飯， 問下情況， 我簡單交代左工作既野， 佢就同我講自己部門d 人同有問題揾邊個， 佢第一個就講呢個大家姐， 好勤力，好博， 好xxxxxx 夕陽無限好， 阿叔從來唔會對女同事有期望， 不論樣同工作上， 因為我地呢行9 成男人， 剩低既係似男人既女人， 總之唔好幻想

第一次見呢個大家姐係係第二個工作地方拜神，pk 係pk 左d , 不過都係咁話， 大舊既男人樣， 有暗瘡， 技安阿妹果隻啦總之。

跟住之後做左冇幾耐， 就開始feel 到佢既影響力， 我果度既總管成q 日借d 意夾我做d 唔係我負責既野， 咁我梗係推啦， 佢一黎就話叫我學下大家姐， 星期日都返黎做， 自己俾錢買野黎做， 晚晚做到9 點10 點先走。。。。><" 大佬啊， 咁你調佢過黎幫你， 我就唔會咁做

再之後有跟過佢既助理調左過黎跟一陣我，經理同我講佢幫我手，不過大家姐話佢唔係好得，叫我教下佢。  個細路都係d 畢業做左一年左右既小伙子， 有d 位好得意， 佢好緊張問我， 呢d 表使唔使每日填， 我話人地要你交先填， 成幾十張唔通日日填， 其他野唔使做啦， 個助理如悉重負：咁就好啦~~ 當下我冇為意， 因為果d 真係雞毛蒜皮既工作， 打到埋黎先搞都ok,  日常仲要應付好多投訴， 又要跟進。
熟左之後個助理先同我講佢俾果個大家姐安排做好多呢d 文件野， 仲有好多其他野❨有好多都唔係我地部門既野❩ 嘩！大佬 , 唔怪得之你晚晚ot o到10 點11 點， 我地第朝要8 點返到啊大佬， 咁又難怪俾人話阿細佬你唔聽話><

再再之後第二個部門既同事打黎問我識唔識用部儀器， 我心知一定又想推波俾我， 我梗係話唔識。
唔夠10 分鐘經理就打俾我， 你點會唔識用部機， 好簡單，點點點， 咁我梗係唔出聲
跟住我同級同事打俾我又問我點解唔識， 大家姐打俾佢叫佢教我用， 我當堂同呢位同事講， 你識唔識掃地， 我俾個掃把你去掃地。呢鋪真心燥， 你有冇搞錯， 明明唔係自己負責既野就攬晒上身， 人地擺明係hup 你將d 波推俾你做， 你就照單全收， 咁唔怪得個個同事都讚你啦， 日日做到10 點， Sorry,  我打份工姐， 唔係同你賣命

再再再之後想講既係， 佢好q 鍾意咩事都開個WhatsApp group,  咩人都add 入去， 炒左既， resign 既總之你同佢見過面都add 入去， 最最最經典係有同事結婚， 我去唔到， 打俾同事講唔好意思去唔到， 問佢請左邊個去， 總之係冇呢個大家姐， 點知佢又開個WhatsApp group,  拉晒d 同事入去， 話夾錢買禮物俾人， 跟住佢就自己成日係入面自己同自己講野， 買呢樣買果樣， 大家夾幾錢， 好幾晚都係自high 自動自我自戀。 黎到佢話佢有日放假(annual leave 唔係sick leave) 話買左卡拎去各同事做野既地方俾佢地寫祝賀詞=="  我等佢黎到之後寫完， 就同佢講過左數， 佢話仲有d 卡既錢， fine 再過俾你
話說佢自己病都係請年假， 無得頂！

佢令我想起上一份工既阿伯同事， 星期日都返工做野， 有得claim ot 都唔claim,  係公司埋頭苦幹20 年， 有一日派信俾佢， 原來炒佢， 我果時做唔夠一年， 都唔知d 公司原來係咁無情， 成team 人10 個淨係炒佢。直到我返而家呢份工既開頭， 佢都有打俾我問有冇工介紹><

打工就係打工，無事無幹等出糧， 唔好搞咁多野
除非果度係你自己生意， 自己既財產命根， 否則你都係唔好係度自high,  仲要影響埋其他人。

辭職

12-2-2018 ❨一❩

終於終於都等到1 月尾出花紅， 第二日早上即刻send 辭職信俾上司， 再打俾佢講唔做啦， 點知反應超大， 又問邊個X 我。。。。。之後當然係無數咁多個人同電話問我， 最經典一個就係個高級經理❨話說呢份工係上一份工個下家介紹， 將我cv send 比佢，佢轉交我直屬上司， in 之後入左黎做❩。

佢一打黎就問咩事走， 我梗係客客氣氣講話自己原因， 唔夠十秒就開始發老脾 , 好多打橫打斜黎講既point X 我：
- 你咁做係咩意思， 大家兄弟班， 一team 人， 幾難搞既野都搞掂， 大家一齊拆掂❨p 你個k,  兄弟班， 一有d 咩事打黎未問清楚就怒X, 朝早7 點打黎吊有， 晚上11 點半吊到12 點幾又有)

-你係我介紹入黎，你係我既人， 你當呢度邊到， 唔係你話黎就後，話走就走❨所以話呢d 經理真係on9 到爆， 你黑社會咩， 介紹份工，仲要係呢份做到暈既工， 咁大恩大德真係沒齒難忘，1 話黎， 係個直屬上司請我 2話走， 我辭職一個月通知， 完啦大佬)

-我唔L 理你，你而家就好似同條女咩緊， 好high 果時你就走左去， 咁算點， 總之你唔可以走❨小朋友， 我唔知同你講咩好❩

如是者吊足20 min,  最後叫我考慮多一晚，我真係俾L 足面， 冇吊返你轉頭。當然第二日WhatsApp 佢都係唔做， 同埋梗係唔聽你電話啦， 高級經理！

呢個世界真係咩人都有， 希望之後可以揾份好工， 遇到d 好人， God please!

欺善怕惡的人

24-1-2018 ❨三❩

上星期經理無理怒X 我， 我心諗都下定決心走人， 同人X 過， 大家就係寫字樓互片。

成個人燥晒

點知星期一返黎佢死晒9 咁話坐低傾下之後要做既野， 今次仲話叫我盡快， 而唔再係果隻L 樣款， 即係係度求我，又笑L 晒口咁樣， 我hea 佢話ok
事實就証明有d L 樣就係欺善怕惡， 乜9 都X 餐， 仲要係求我做佢d野

我做人從來唔鍾意打打殺殺， 見佢死狗左， 咁我都識做， 第2 日朝早同佢講：唔好意思，我語氣重左
之類， 佢又係度自high 9 笑

Anyway,  事情總算過一段落， 呢兩個星期真係唔好受， 我要記住呢一刻， 等花紅日就resign

花紅啊花紅！

花紅

18-1-2018 ❨四❩

花紅阿花紅， 我永遠都等你， 都咁愛你， 只要你一黎我身邊， 我就同你一齊離開呢度， 頭也不回！
我愛你！

食左兩隻死貓

17-1-2018 三

上星期個經理打俾我幾次叫我跟d 做新証既野， 我不以為而， 但又唔知點做， 唯有跟住個指引做， 完全摸不著頭腦， 9 交左俾做証公司既其中一個人， 俾佢話左幾句話唔係咁做， 開會一早講左。。。。
><"""" 唔係下話， 幾時開會我唔知既， 咁唯有問清楚再做再交， 點知星期一Director 落黎開會， 搭車返工個高級經理打黎問做証做成點？ 阿經理話你搞， 吊足10 分鐘。❨事後先知原來係第2 個部門既一條廢J 搞， 佢搞唔掂， 唔知點解就推左過黎， dklm)

做証keep 住吊又keep 住做都算啦， 今日經理又打黎話果d 文件要交啦， 我問係咩黎，我唔清楚wow,  佢話咪你做開果d xxxx RA BC 之類果d,  咁我咪話問清楚上家公司到底要咩， 佢就x 我 問咩， 你唔可以話唔清楚， 聽日要交。。。。原來聽日有個大會係上家公司既問責大會， 其實佢又係用呢招， 通知左我， 個波就係我，咁都得？！

阿叔自問都會盡力做好自己手頭上既工作， 問題係原來阿經理兩個月前已經開會俾人追， 臨尾一星期同最後幾日將兩個死貓掉過黎， 大佬阿， 你俾合理既時間我去做， 我實用盡力搞， 而家去到deadline 先同我講， 我點嘔俾你？ 最正係果一大疊交件part 1 係佢負責， part 2 先係我搞， 咁你都未做我點做？

黃子華你教下我plxxxx!

T-Mac 既意志

每當意志消沉既時候， 都會想快d 積極返， 其中一個做法就係睇d 熱血既野

好多時都睇返 T-Mac 係火箭對馬刺果場33 秒入13 分反敗為勝

火箭fans 早就離場， 點會估到靠T-Mac 既意志同最後神準既3 分最後贏波。

意志啊！！！！！

2018 方向

08-01-2018 ❨一❩
今年真係好希望可以揾份返5 day 既工， 之後有多d 時間做自己鍾意既野

瞓足一日

07-01-2018 ❨日❩

尋晚落雨冇去打波， 今日仲要瞓足一日

人生得返返工><

星期六要返工

06-01-2018 ❨六❩

極度攰既情況下起身返工， 尋晚收工雖然冇練習， 但係個人都因為做野太忙， 成個人都身心疲倦><"

而家好想快d 收工， 夜晚同fd 去打下波

工作上， 打左就黎 6 年工， 轉左3 間公司， 間間都處於高壓情況下渡過。
返工時間星期一至六❨星期六長短週，短週休全日❩, 朝8 晚6, 放銀行假， 12 日 AL
如是者做左差唔多6 年， 自己感覺頂唔順， 揾日打篇工作辛酸史。

雖然香港呢個打工奴隸世界黎講， 呢個package 算普通， 有好多人返得仲多日子仲長工時， 但而家都係想過左年揾份返5 day,  準時放工， 唔好咁大壓力既工， 之後可以多d 做運動同陪屋企人。

主啊！求下你~~

2-1-2017 二

放左10 日假返大陸集訓7日， 冬訓令我重拾熱血，每日 6點半起身練跑，下午再練多一課， 超攰！！！

雖然狀態提升都唔係太大， 但係心態好左好多， 希望之後會堅持到定期練習。

今日返工， d 負能量又返晒黎， 係咁俾人X 。 唯有自己努力><"